Ruslandimik suleqateqarunnaarnissaq Savalimmiuni partiinit anguniarneqarpoq
Savalimmiuni nunanut allanut tunngasunut naalakkersuisoq Jenis av Rana aalisarnerup tungaatigut Ruslandip suleqatigiunnaarnissaanik kissaateqarpoq. Naalakkersuisooqataasut qanoq iliussanerlutik suli nalornipput. Ruslandimik isumaqatigiissutip atorunnaarsinneqarnissaa illuatungiliuttut Javnaðarflokkurin suliniuteqarput.
Russit kilisaataat Savalimmiuni tulassinnaapput, pisatik usingiarsinnaallugit kiisalu Savalimmiunik aamma aalisarnerup tungaatigut isumaqatigiissuteqarluni. Ukiortaaq tikitsinnagu isumaqatigiissutaat isumaqatiginninniutigineqassaaq. Isumaqatiginninniartoqarnissaa pilersaarutaasoq, Savalimmiuni aalisarnermut naalakkersuisoq, Árni Skaale, Folkeflokken, oqarpoq.
Savalimmiuni nunanut allanut tunngasunut naalakkersuisoq, Jenis av Rana, Midterpartiet, akerlianik isumaqarpoq. Rusland suleqatigineqarunnaartariaqartoq isumaqarpoq. Taama oqarpoq Putin oqariartuuteqareersoq Ukrainemut sorsunnermi sakkutuut 300.000-t qaaqquneqassasut.
- Ruslandimik suleqateqarnerput unitsittariaqarparput. Ilisimagaluarpara russit aalisariutini sulisuusut sorsunnermut akuunngitsut. Tamannali iliuuseqannginnitsinnut utoqqatsissutaasinnaanngilaq, Jenis av Rana nutaarsiassaqartitsivimmut In.fo-mut oqarpoq.
Lagmandi ataatsimeeqateqassaaq
Ruslandimik aalisarnermut isumaqateqarneq pillugu ataatsimiittoqarnissaa anguniarlugu lagmandi Sambandspartimeersoq Bárður á Steig Nielsen partiinik qaaqqusivoq ullut 14-t qaangiummata.
Savalimmiormiut Barentsip imartaani Ruslandimi isumaqatigiissut malillugu saarullinniarsinnaavoq. Russit aamma Savalimmiut imartaanni isumaqatigiissut malillugu aalisarsinnaapput.
Savalimmiormiut ataatsimut isumaat avammut nalunaarutigineqarnissaa lagmandip pingaartippaa. Aappaagumut pisassiissutinik isumaqatiginninniartoqassasoq ataatsimiittoqareernerani saqqummerpoq.
Lagmand Bárður á Steig Nielsen Kringvarp Føroya-mut oqarpoq, partiit tamarmik Ruslandimik isumaqatigiissusiortoqassanersoq ataatsimiittoqaqqissasoq oqarpoq.
Isumaqatigiissutip atorunnaarnissaa Javnaðarflokkurinimit piareersimaffigineqarpoq
Savalimmiuni naalakkersuinikkut siulittaasuusimasoq, illuatungiliuttuni Javnaðarflokkurinimi siulittaasoq Aksel V. Johannesen oqarpoq, Ruslandimik isumaqatigiissutip atorunnaarsinneqarnissaa partiimit piareersimaffigineqartoq.
- Isumaqatigiissut sivitsorneqassappat eqqortuliornerussanngilaq. Nunarsuup kitaani nunat isumaat isumaqateqarnerput pillugu Naalakkersuisuusut tusarusuppakka. Ruslandimut kinguneqartitsisoqarnera tusaasariaqarparput, Aksel V. Johannesen Kringvarp Føroyamut oqarpoq.
Isumaqatigiissut sivitsorneqassanngippat Savalimmiunut aningaasatigut qanoq kinguneqassanersoq aamma paaserusunneqarpoq.
Nunani avannarlerni aalisarnikkut suleqateqartoqalissappat Ruslandimik suleqateqarunnaarnissaq tapersersorniarlugu illuatungiliuttut Tjóðveldi aamma oqariartuuteqareerput.