Skip to main content

Ruslandi Norgelu suleqatigiillutik nannut kisissavaat

Barentshavemi nannut qanoq amerlatiginersut Ruslandi Norgelu suleqatigiillutik kisippaat

Barentshavemi qeqertanilu nannut qanoq amerlatiginersut russit norskillu suleqatigiillutik kisissavaat. 

Svalbardimi Frans Josefs Landimilu nannut kingullermik ukiut aqqanillit matuma siorna kisinneqarput. Taamani nannut 3.000-iusut paasineqarpoq. 

- Silap kissatsikkiartornerata ilutigisaanik pingaaruteqarpoq nannut qassiunersut ilisimassallugit. Barentshavemimi sikusarnera annikilliartuinnarpoq. Taamatut allannguuteqartorarneranut qanoq kinguneqarnersoq misissorneqassaaq, Tromsømi biodiversitetsimi pisortaq Kit Kovacs oqarpoq. 

Silaannaap kissatsikkiartornerata kingunerisaanik nannut qanoq iliuuseqarnersut ilisimassallugu pingaaruteqarpoq. Silaannaap kissatsinneruneranut qanoq naleqqussartarnersut paasiniarneqassaaq. 

Nannut kisinneqarnissaannut norskit naalakkersuisuisa 8,7 million koruunit atorneqarnissaat aalajangerpaat. Nannut kisinneqarnissaannut isumaqatigiissut norskit russillu sapaatip akunnerata siuliani atsioqatigiissutigaat. 

Kisitsisarneq ajornakusoortartoq
Ukiut aqqanillit matuma siornatuut nannunik kisitsisoqassaaq aggustimit aallartittumik. 

Ilisimatuut qulimiguullit umiatsiallu atussavaat. Sumiiffinni assigiinngitsuni kisitsisassapput. 

Svalbardimi Frans Josefs Landimilu nannut aamma qanoq imminnut qanitsiginersut misissorneqassaaq. 

Kisitsinermili qulakkiivinneqarsinnaanngilaq nannut qanoq amerlatigeqqissaarnersut. Nannut kingullermik kisinneqarmata naatsorsuutigineqarpoq 1899-t aamma 3592-t akornaniinnissaat. 

- Nannunik kisitsiniarneq ilungersunartuusarpoq. Assigiinngitsut periutsit atorneqartussaapput. Russit suleqatigineqassapput, nannummi nunat killeqarfii soqutiginngilluinnarpaat, Kit Kovacs oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER