Rusland pillaatitut iliuutitik annertusivaat: Kalaallit pingasut eqqorneqarput
Rusland pillaatitut iliuutitik annertusivaat, annertusiisoqarnerani Kalaallit Nunaanniit pingasut eqqorneqarput. Taama Ruslandip nunanut allanut ministereqarfia paasissutissiivoq.
Nalunaaqutaq 11.40 nutarterneqarpoq... Nunanut allanut Naalakkersuisoq pisoq oqaaseqarfigaa.
Rusland pillaatitut iliuutitik annertusassallugit aalajangerpoq, annertusaanermi Island, Norge, Kalaallit Nunaat Savalimmiullu eqqorneqarput.
Pillaatitut iliuuseqarnermi annertusaanermi Kalaallit Nunaaneersut pingasut eqqorneqarput, maannalu eqqugaasut Ruslandimut iseqqusaajunnaarlutik.
- Inatsisartuni ilaasortat, Naalakkersuisuni ilaasortat, inuussutissarsiornermi suliallit, ilisimatusarnermi suliallit tusagassiornermilu suliallit taamatuttaaq nalinginnarmik tamanit ilisarisimaneqartut, Ruslandip iliuusaanut akerlilersuisut Ruslandimi akuerineqanngitsutut nalunaarsukkami inissinneqarput. Taama Ruslandip nunanut allanut ministereqarfia nittartakkamini allappoq.
Naalakkersuisut uagutsitulli ilisimasai annertutigisut, Nunanut allanut Naalakkersuisup, Vivian Motzfeldtip paasissutissiissutigaa.
- Ilissituulli ilisimasagut inissisimapput. Pillaatitut iliuuserineqartut kikkunnut atuutsinneqarnersut naluagut, oqaannarsinnaavugulli taamatut pisoqartoq. Ruslandimut pillaalluni iliuuserineqartut Ruslandip maanna akiniutigaa, tamannalu alianarpoq ajorluinnarlunilu. Issittumi Siunnersuisoqatigiit sulinerat unikkallarnikuuvoq, taamaammallu aamma Issittumi nunat akornanni pitsaasumik oqaloqatigiittoqarsinnaanngilaq, tamannalu tamanut alianartuuvoq, Vivian Motzfeldt (S) Sermitsiaq.AG-imut oqarpoq.
31-it akuerineqanngitsutut nalunaarsorneqartut
Islandimeersut qulingiluat, Norgemeersut 16-it, Kalaallit Nunaaneersut pingasut Savalimmiuneersullu pingasut pillaatitut iliuuseqarnermi eqqorneqartut, Rusland paasissutissiivoq.
Tamanna pivoq EU-p Ruslandimi atorfilittanut pillaatitut iliuuseqarnerani Island, Norge, Kalaallit Nunaat Savalimmiullu tapersersuineranni.