Rusland Pele pillugu: Issittumi avissaartuuttoqassanngilaq
Danmarkimi tusagassiuut naapertorlugu nunanut allanut naalakkersuisup sakkutooqarnikkut tapersersorneqarnissaq pillugu USA-mut isumaqatigiissuteqarnissamik oqaaserisimasai tunngavigalugit Ruslandip aallartitaa nikussaarpoq. Aallartitaqarfimmit taamaattoqarnera ilumuunnginnerarneqarpoq.
Nunanut allanut Naalakkersuisup, Pele Brobergip (N), DR Deadlinemut Kalaallit Nunaata illersorneqarnissaq eqqarsaatigalugu Islandip aaqqissuussivigineqarneranut assingusumik aaqqissuussivigineqarnissaanik isumassarsiaq oqaatigisimavaa. Kalaallit Nunaata Islandimut aaqqissuussineq malissappagu tamanna isumaqassaaq, Kalaallit Nunaata sakkutooqarnikkut isumannaallisaavigineqarnissamik qularnaveeqqusiivigineqarnissaq pillugu Kalaallit Nunaata USA-mut illugiilluni isumaqatigiissusiornissaanik.
Taamatut naalunaarneq Berlingske naapertorlugu Ruslandip Danmarkimi aallartitaanit, Vladimir V. Barbinimit, sakkortuumik isornartorsiorneqarpoq. Berlingske.dk ilaatigut allappoq, aallartitaq oqarsimasoq, Kalaallit Nunaata taamatut nalunaarnera ”inussiarnisaarnerunngitsoq”. Taamaattorli Ruslandip aallartitaqarfiata Ruslandip Pele Brobergip oqaasii tunngavigalugit Issittumi avissaartuunnermik pilersitsinissamut piareersimaneranik Berlingskemit saqqummiussaq tallimanngornermi ilumuunnginnerarniarlugu toqqarsimavaa.
Vladimir V. Barbin Berlingskemi allaaserisamut oqaaseqaatimini oqarpoq, tusagassiuummit kukkusumik issuarneqarsimalluni, Ruslandilu Issittumi avissaartuunnermik pilersitsinissamik siunertaqanngitsoq, kisiannili eqqissisimanerup attatiinnarnissaanik Ilulissanilu isumaqatigiissutip, piujuaannartitsilluni ineriartortitsineq pingaartillugu Issittup eqqissisimanartuunissaanik qulakkeerinnittussap, malinnissaanik kissaateqartoq.
Taama oqaaseqarneq nunanut allanut naalakkersuisup Pele Brobergip taperserpaa, paasissutissiillunilu, Kalaallit Nunaat Ruslandilu pitsaasumik oqaloqatigiittut.
- Qanoq oqarsimanera pillugu allat qanoq oqarsimanera isummersorfiginianngilara.Kisianni Issittumi Siunnersuisoqatigiit ataatsmiinneranni Islandimiitillunga Ruslandip nunanut allanut ministeria aamma naapisimasimavara, akunnitsinnilu aaqqiagiinngissuteqartoqanngilaq, Pele Broberg Sermitsiaq.AG-mut oqarpoq.
Namminerisamik sinerissamik nakkutilliisoqarneq
Taanna nassuiaalluni oqarpoq, Kalaallit Nunaata namminerisaminik sinerissamik nakkutilliisoqalernissamik anguniagaq Kalaallit Nunaata anguniarniaraa. Kisianni sinerissamik nakkutilliinermik isumaginnittut tassaassanngillat sakkutooqarnikkut sulisut.
- Kalaallit Nunaata inuinnarnik atorfinitsinneqarsimasunik inuttaqartumik namminerisaminik sinerissamik nakkutilliisoqalernissaa takorluugaraarput. Issittumi Siunnersuisoqatigiit assersuutigalugu Coast Guard Forumeqarput, tassanilu USA Islandilu ilaatigut ilaasortaallutik. Kalaallit Nunaat namminerisaminik sinerissamik nakkutilliisoqalersinnaappat, taava uagut oqallittarfimmut tassungaa aamma ilaasinnaanngussaagut, oqarpoq.
Taanna nassuiaalluni oqarpoq, tamatumani imarsiornerup iluani amerlanerit ilinniagaqalernissaat soorunami pisariaqassasoq.
Danmark oqartussaanermik isumaginnittoq
Ullumikkut Danmarkip sillimaniarneq illersornissaqarnerlu akisussaaffigai, tamatumanilu Issittumi Sakkutooqarfiup Kalaallit Nunaanni oqartussaaneq isumagisaralugu.
Danmarkip nunanut allanut ministeria Jeppe Kofod Sermitsiaq.AG-mut paasissutissiilluni oqarpoq, USA-p sakkutooqarnikkut isumannaassutsimik isumaginnittuunissaanik Kalaallit Nunaata kisssaateqarneranik Pele Brobergip oqaaserisimasai tusarsimanngikkini.
Taamaattorli eqqaasitsissutigaa, Kalaallit Nunaat Danmarkilu sinaakkutissanik aalajangersimasunik sulinissamut aallaaveqarmata, tassalu Naalagaaffeqatigiinnermik aamma Namminersorneq pillugu Inatsimmik. Tamanna isumaqarpoq, Danmarkimi naalakkersuisut Kalaallit Nunaanni illersornissamut sillimaniarnermullu politikkimik suli isumaginnittuunerannik.
- Sinaakkutissat taakkua iluanni, Danmarkimi naalakkersuisut isumaat uangalu inuttut isumaga tassaapput, sulinerput naligiinneq, ataqqinninneq peqataatitsinerlu tunngavigalugit piorsassagipput. Taamaattumik ataatsimoorussanik suliassaqartillugu aamma nunanut allanut sillimaniarnermullu politikki suliassaqarfinnut taakkununnga ilaatillugu, taava Kalaallit Nunaat peqataatittassavara, Jeppe Kofod Kangerlussuarmit aallarnissani sioqqutitsiarlugu oqarpoq.