Skip to main content

Rusland Kitaani akaarineqanngilaq - Issittumiunngitsorli

Ukraine-mik aaqqiagiinngissuteqarneq pissutigalugu Issittumi politikkikkut suleqatigiinnermi sunniuteqarnera killilerneqarpoq, pillaatilli eqquipput

Rusland nunanit Kitaamiunit akaarineqanngikkaluarpoq, nunali suli Issittumi suleqatigiinnermi peqataavoq. Ukraine-mik aaqqiagiinngissuteqarneq pissutigalugu russit issittumi politikkikkut suleqatigiinnermi sunniuteqarnerat kissaatigineqartutut annertutigisimanngilaq, ilami annikilleriangajassimalluniluunniitd.

Ruslandip issittortaa naalagaaffiup sinneranit avissaarsimarpasissinnaagaluartoq kitaamiut Ruslandimut aningaasarsiornikkut pillaataat tamaani aningaasarsiornermut sunniuteqarpoq. Pingaartumik uuliamik nerisassanillu avammut tuniniaaneq eqqorneqarput.

Tamanna takuneqarsinnaavoq nunat tamalaat ataatsimeersuarneranni Arctic Frontiers-im, tassani siusinnerusukkut russit aallartitarpassuaqartarsimammata. Ukioq manna ataatsimeersuarnermi peqataasunit 1400-nit russit peqataasut 40-t inorpaalluunniit.

Norgep nunanut allanut ministeriata Børge Brende-p isertuutinngilaa Norge immikkut ittorujussuarmik inissisimasoq, tassa  illua'tungaatigut Ruslandimut pillaatit tapersersoraluarlugit, aappaatigut kissaatigigamiuk Rusland issittumi suleqatigiinnermi peqataaginnassasoq.

Qallunaat nunanut allanut ministeriat Martin Lidegaard, Radikale Venstre, isumaqataavoq:

– Ukraine-mi pissutsit pissutigalugit EU Issittumilu Siunnersuisoqatigiit tunarsimaaraluartut neriuppunga Rusland oqaloqatigisinnaallutigu. Isumaqatigaaraa Issittoq pissanganartorsiorfiunngitsutut attatiinnassagipput.

Politikkikkut pissutsit najummassimanaraluartut uuliap akiata appariartornera Ukraine-milu pisut pissutigalugit pillaateqarnerit pissutigalugit rubel-ip nalikilliartupiloornera aamma russit ataatsimeersuarnermi peqataasinnaasut angalarujussuseqarnerannut sunniuteqarpoq.

– Issittumi ajornartorsiuteqanngilaq ataatsimut paasinninnikkut anguniagalimmillu oqaloqatigiinnikkut aaqqinneqarsinnaanngitsunik, præsident Putinip issittumut siunnersortigisimasaa, issittumi ilisimasassarsiortartoq Artur Tjilingarov siusinnerusukkut Artic Frontiers-imi ataatsimeersuarnermi oqarpoq.

Taanna ataatsimeersuarnermi russini kisiartaalluni oqalugiarpoq, Kitaalu sumilluunniit eqqaanagu, taamaallaalli sammillugu tamaani killeqarfiit akimorlugit suleqatigiinnissaq.

– Ajornartorsiuteqanngilaq sakkutuulersorluni aaqqittariaqakkanik, Tjilingarov oqarpoq, nunallu allamiut ilisimatuui qaaqqullgir Ruslandip sikutarujussuarmi ilisimatusarfiata nutaap ammarneqarnissaanut.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER