Rusland Kalaallit Nunaannut iluareqqusaarpoq
Rusland nunanut pissaanilissuarnut Kalaallit Nunaannut iluareqqusaartunut ilannguppoq. Pineqarput isumalluutit, aatsitassat aamma kulturikkut suleqatigiinneq, taamatut oqarpoq russit Danmarkimi aallartitaat Vladimir Barbin.
Ruslandip Kalaallit Nunaat qaninnerusumik suleqatiginissaa, imminnut tikeraaqatigiittarnissat aamma oqaloqatigiittarnissat soqutigilluarpai covid-19 pillugu pisut tamakku pisinnaatilerpatigit. Tamanna ilutigalugu Issittumi Siunnersuisoqatigiinni upernaaq manna Rusland siulittaasunngorpoq.
Tamanna atuarneqarsinnaavoq nunanut allanut politiki pillugu nalunaarusiami Inatsisartuni oktobarip ulluisa 28-anni oqallisigineqartussami. Russit aallartitaqarfianni Københavnimiittumi aallartitap Vladimir Barbinip russit kissaataat uppernarsarpai.
– Ruslandip Kalaallit Nunaannik qaninnerusumik attaveqaqatigiinnissaq kissaatigisorujussuuaa. Nunarsuup issittortaani ataatsimoorussarpassuaqarpugut suleqatigiinnikkut tamatta nuannaarutigisinnaasatsinnik, taamatut immitsinnit ilikkarfigisinnaasatsinnik, Vladimir Barbin Sermitsiamut oqarpoq.
Aalisakkat pineqarput
– Ruslandimut ingammik isumalluutit pitsaanerpaamik atorluarnissaat pineqarpoq. Taamaattumik aalisakkat pillugit politikimi qanimut suleqatigiissaagut aamma Atlantikorsuup Avannaani aamma Polarhavetimi aalisakkat ingerlaartarnerat pillugu ilisimatusarnermi. Suleqatigiinnerup aammattaaq qulakkiissavaa isumalluutinik pisassiissutigineqartarnerata malittarisassiorneqarnissaa, taamatut issittumi naalagaaffiit sineriattallit aalisarnermi assigiinnik periarfissinneqarsinnaasunngorlugit, Barbin oqarpoq, taassumali Aalisarneq pillugu Ataatsimiititaliarsuup isumaliutissiissutaa qanittukkut Kalaallit Nunaanni oqallisigineqarluartoq isummerfiginianngilaa.
Oqaluttuaq tamaat Sermitsiami sapaatip akunnerani matumani saqqummersumi atuarsinnaavat, ugguuna iserfigiuk:
