Rusland allakkanut ilumuunngitsunut akulerussimannginnerarpoq

Paasisimasallit arlallit danskillu politikkeriissa oqaatigisimavaat, ilimanartoq Rusland imaluunniit Ruslandimi pissaanillit Ane Lone Baggeri Amerikami senatorimut Tom Cottonimut allassimasuusaartillugu allakkanik ilumuunngitsunik suliaqarsimassasut.

Ruslandip Danmarkimi aallartitaqarfiata taamatut eqqarsaasersuuteqarneq ‘akisussaassuseqanngitsutut, pissutissaqanngitsutut Ruslandillu Issittumut politikkianik kukkusumik takutitsisutut’ Facebookikkut oqaatigaa.

- Rusland .. issittumi naalagaaffiit akornanni tatigeqatigiinnerulertoqarnissaanik, issittullu patajaattuujuarnissaanik isumannaatsuujuarnissaanilu soqutiginnittuuvoq. Issittumi naalagaaffiit akunnerminni attaveqatigiinnerat Ruslandip akuliuffigisimanngisaannarpaa aamma qaquguluunniit akuliuffiginavianngilaa, aallartitaqarfik allappoq.

Pissaanillit Issittumi aaqqiagiinngissuteqalersitserusuttut pisuutikkai

Aallartitaqarfimmit isumaqartoqarpoq, kina allagaqarsimanersoq paaserusukkaanni, allarluinnarmut isiginiartoqartariaqartoq.

- Oqqassaarinermik taassuminnga allattut Issittumi Ruslandip nukittunerusumik inissisimanissaanik nunarsuullu ilaani tassani pissanganartorsiunnginnissamut akerliusut akornanniissapput, aamma allattut anguniarsimassuaat, issittumi naalagaaffiit suleqatigiilluarnerat aporaannermik nunallu imminnut ungasinnerulernissaannik taarserneqarnissaat.

Aallartitaqarfiup matumani kikkut eqqarsaatiginerai takuneqarsinnaanngilaq.