Rubinisiorfiutileqatigiiffik aningaasaliiffigineqarnissamut pingaarutilimmik isumaqatigiissuteqartoq
Rubinisiorfiutileqatigiiffik Greenland Ruby 110 millioner koruuninik aningaasaliiffigineqarnissamut isumaqatigiissuteqarsimavoq, aningaasaliissuteqarnikkut ingerlatseqatigiiffiup ingerlaannarnissaa aamma Kalaallit Nunaanni sumiiffinni allani piiaanissamut pilersaarutaata ingerlaannarnissaa qulakkeerneqarput.
Miamimi aningaasaliissuteqartarnermik ingerlatseqatigiiffik Nebari Natural Resources Credit Fund I, LP, Greenland Ruby-mik 18 millioner dollarsinik aningaasaliissuteqarnissamut isumaqatigiissuteqarsimavoq, aningaasat Aappaluttumi rubinisiornerup ingerlaannarnissaanik aamma Kalaallit Nunaanni sumiiffinni allani rubinisiornissamik qulakkeerinnissapput
Aningaasaliissuteqartarfiup tamanna Kalaallit Nunaanni suliaasa siullersaraat, aningaasaliissuteqarnissamullu atatillugu pilersaarutaavoq aningaasaliissutiginiakkat pingasoriarluni tunniunneqartarnissaat, maajip naanerani siulliit tunniunneqassallutik.
- Greenland Ruby-mut tamanna pingaaruteqarluinnarpoq, Nibarisimiimmi aningaasaliissutit aqqutigalugit ineriartornissamut pilersaarutivut pilertornerusumik ingerlassinnaalissavavut, Greenland Ruby-mi pisortaaneq Magnus Kibsgaard tusagassiorfinnut nalunaaruteqarnermi oqarpoq.
Ilumoortumik suleqatigiinneq
- Aningaasaliiffigineqarnitsigut maanna piiaaffigisatsinni suliaqarnerput ingerlatiinnassavarput, aammali sumiiffinni angusaqarluarluta misissuinissamut akuersissuteqarfigisimasatsinni suliaqarnissarput qulakkeerneqarpoq, pisortaaneq Nebari aatsitassarsiornernut aningaasaliissuteqartarnermik misilittagaqarlurlunilu iluatsitsisartoq innersuussutigalugu oqarpoq.
- Aningaasaliissuteqarnissamut isumaqatigiissutaaginnanngilaq, aammali ilumoortumik suleqatigiinneruvoq, Magnus Kibsgaard oqarpoq.
Nebari aningaasaateqarfiuvoq namminersortunit pigineqartoq, taanna pisortat namminersortullu suliffeqarfiutaasa aatsitassarsiorfiutaannut siunnersuillunilu akiitsunut tunngatillugit ikiorsiissuteqartarpoq.
Ukiuni qulini ingerlanneqartussaq
Rubinisiorfik 2017-mi ammarneqarpoq, naatsorsuutigineqarlunilu minnerpaamik ukiuni qulini atuutissasoq. Ingerlatseqatigiiffik Nuummi qullersaqarfeqarpoq, New York City-mili tuniniaanermut nittarsaassinermullu allaffeqarluni, aamma Parisimi, bangkokimit, Københavnimi Norgemiittumilu Mo I Rana-mi allaffeqarluni. Greenland Ruby LNS Groupip norgemiumit pingeqartup immikkoortortaraa.