Rubinisiorfik milliuunilikkaanik aningaasaliiffigalugu annariarneqassaaq
Coronap atuunnerani nunarsuaq tamakkerlugu rubininik tunisassiorneq sakkortuumik eqqugaasimasoq ingerlatsinerup ingerlatiinnarnissaanut aningaasanik pissarsiniarluni tamaviaaruteqarpoq. Greenland Rubymi piginneqataassutinik piginnittut Norgemeersut Greenland Venturellu ingerlatsineq ukiumi ataatsimi qulakkeerniarlugu suliffeqarfimmut millioninik marlunnik kisitsisitalinnik ungasinngitsukkut aningaasaliissuteqarnissaat ilimagineqarpoq.
Greenland Rubymi piginneqataassutinik piginnittut Norgemiut ingerlatseqatigiiffiannit piginnittuusumit LNS Miningimeersut aamma Kalaallit Nunaanni Greenland Venturemeersut rubininik tunisassiorfimmut amigartooruteqarfiusumut millioninik marlunnik kisitsisitalinnik ungasinngitsukkut aningaasaliinissap isumaqatigiissutiginissaa ilimagaat.
Aviisi Sermitsiaq taama allappoq.
Taama pisoqassaaq 2021-mi aasap tungaanut ingerlatsinermut aningaasassaqarnissaq qulakkeerniarlugu aningaasaliissutinik sulinermi atugassat aningaasalersorniarlugit.
Piiaanermik ingerlatsiveeqqamit annertuunik unammilligassalimmit nutaarsiassat nuannersut taamaapput.
Rubininik suliaqarfik inunnut sanngiitsunut naleqquttuunngilaq. Coronap nunarsuaq tamakkerlugu tuniluunnera, piiaaffiit, silisisarfiit, akitsorterussisarfiit tunisassianillu pisiniarfiit matoorarnerannik kinguneqartoq pissutigalugu rubinit maannakkorpiaq aningaasarsiutaanngillat.
- Kalaallit Nunaanni suliniutip tamarmiusup aningaasalersornissaa tamaviaarluta sulissutigaarput ingerlatseqatigiiffiup ingerlaannarnissaanut aningaasaliinikkut. Piginneqataassutinik piginnittut qaammatit ataatsip marlulluunniit ingerlaneranni Greenland Rubymut millioninik marlunnik kisitsisitalinnik aningaasaliissuteqarnissaq pillugu isumaqatigiissusiornissaat neriuutigaara. Piginnittut akornanni ingerlatseqatigiiffimmut aningaasaleeqqinnissaq piumassuseqarfigilluarneqarpoq.
Frode Nielsen piginneqataassutinik piginittut annersaannit LNS Miningimik aamma Greenland Rubymik aqutsisuusumit suliffeqarfissuarmit LNS-imeersoq, taama oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: