Aappaluttoq
Rubininik piiaaffik Sermersuup isumalluarfeqaa
Qeqertarsuatsiaat eqqaanni Aappaluttumi rubininik piiaaffiup ammarneqarnera borgmester Asii Chemnitz Narupip nuannaarutigaa
Pingasunngormat True North Gems nalunaarpoq Qeqertarsuatsiaat eqqaanni rubininik safirinillu aappaluttunik qaamasunik piiaaneq aallartillugu.
Kommuneqarfik Sermersuup borgmesteriata Asii Chemnitz Narupip (IA) suliniut nuannaarutigalugulu isumalluarfigaa.
Suliffiit
– Uannut borgmesteritut ulloq aamma pingaaruteqarpoq, ukiuni arlalinni piiaaffiup ingerlanissaa qilanaarigakku, naatsorsuutigineqarmat sumiiffimmi nunaqavissunut suliffinnik nutaarluinnarnik 80-it missaanniittunik pilersitsisoqassasoq, taanna tusagassiorfinnut nalunaarutikkut allappoq.
Asii Chemnitz Narupip qularutiginngilaa rubininik safirinillu aappaluttunik piiaaffiup kommuni tamaat siuarsassataa.
Kaaviiaartitat
– Tassami isumalluartoqartorujussuuvoq. Suliffissarpassuit pitsaasut kisiisa eqqarsaatiginagit, aammattaarli kaaviiaartitassatut naatsorsuutigisat, kikkunnut tamanut isumalluarnartorujussuit, eqqarsaatigalugit.
– Nuannaarnissamut pissutissaqarpoq, True North Gemsillu piiaaffimmik ingerlatsineranik sunik tamanik iluatsitsilluarnissaata kissaannissaanut pissutissaqarluni. Tamanna tamatta iluaqutigissavarput, kommunip illoqarfiit pingaarnersaqarfiup borgmesteria oqarpoq.