Rubininik Kalaallit Nunaanneersunik kikkut tamarmik maanna pisiaqarsinnaanngorput

Greenland Ruby webshopimik ammaavoq, Kalaallit Nunaanni innuttaasut rubininik pink safirinillu tuniniaasinnanngorlugit

- Suliniut aallartinneqarmalli rubininik pink safirinillu toqqaannartumik tuniniaasinnaaneq nunamit tamarmit ujartorneqarsimavoq. Taamaammat nuannaarutigaarput www.ruby.gl atuutsilersinnaagatsigu nunamilu maani piumaneqarnerat naammassisinnaanngorlugit. Ujaqqat ataasiakkaat pinnersaasiallu assigiinngitsut tuniniarneqarsinnaanngorput, tuniniaanermi pisortaq Christian Andersen Sermitsiaq.AG-mut ilisimatitsivoq.

Greenland Ruby nunamut tamarmut tunniussisarnissamik isumaqatigiissuteqarsimavoq, 2.500 koruunillu sinnerlugit nalilimmik pisiaqaraanni, Kalaallit Nunaanni sumiluunniit najugaqaraluaraanni nassiunnera akeqarani. Taamaattoq assartorneranut 199 koruuninik akiliisoqartassaaq.

Nunat allat malinnaatineqassasut

Maannakkuugallartoq nunami maani taamaallaat tuniniaasoqarlunilu nassiussisoqarsinnaavoq, ingerlatseqatigiiffiulli anguniagaraa webshop aqqutigalugu Islandmimut, Savalimmiunut, Danmarkimut Nunanullu Avannarlernut allanut aamma atuutsinneqalernissaa.

- Soorunami nunarsuarmut tamarmut tuniniaarusussinnaavugut, suliassat ataasiakkaarlugit suliarissavavut, siullermillu najukkami tuniniaanissamik neqerooruteqarnerput pingaarnerpaagallarpoq. Taamaammat aasap ingerlanerani Nuup umiarsualiviani pisiniarfimmik ammaanissarput aalajangersimavarput, naatsorsuutigalugu umiarsuarnut ilaallutik takornariartartorpassuit soqutiginninnissaat, tuniniaanermi pisortaq oqarpoq.

Takornarianut tuniniaaneq

Webshopip Nuullu umiarsualiviani pisiniarfiup nutaap saniatigut Greenland Rubyp Hotel Arctic Ilulissaniittoq Aoir Greenlandilu isumaqatigiissuteqarfigisimavai, pinnersaasianik aalajangersimasunik akunnittarfimmi timmisartorsuarmilu atlantikukkoortaammi Norsami tuniniaasarnissamik.

- Isumaqatigiissuteqarfigeriikkatta saniatigut nunami maani takornariartitsisartunik pingaarutilinnik allanik siunissami qaninnerpaami isumaqatigiissuteqarnissarput neriuutigaarput, Christian Andersen oqarpoq.

Powered by Labrador CMS