Royal Runimut 500-t sinnillit peqataaniarlutik nalunaarsimasut

Kunngissaq peqatigalugu arpannissamut soqutiginnittorpassuusut

Kunngissaq Frederik peqatigalugu arpannissamut soqutiginnittoqarluarpoq. Arpannissamut aaqqissuisut ullumi nalunaaqutaq 10.40 tusagassiorfinnut nalunaaruteqarmata, inuit 500-t sinnillit, tassa inuit 542-5, peqataaniarlutik nalunaaruteqareersimapput.

- Piareersaanerit aallartilluareerput, teknikkimut ajornaatsortaanullu tunngasut piareersarneqarput. Sisamanngornermi ulloq 28. maj 2020 arpartitsineq nuannerluinnartumik inuit puigugassaanngitsumik misigissavaat. Qaammatit pingasorpiaat qaangiuppata arpatsitsisoqassaaq, aaqqissuisoq Kim Godtfredsen tusagassiorfinnut nalunaaruteqarnermi oqarpoq.

- Royal Runimit aallartitat sapaatip akunneri pingasut qaangiuppata Nuummi aaqqissuisuusugut naapeqatiginiarluta tikissapput. Arpannissaq piareersarneqassaaq, arpaffissaq, teknikki immikkuualuttullu ataqatigiissaarneqassallutik.

Kim Godtfredsenip ilanngullugu erseqqissaatigaa, Royal Runimut suli sungiusartoqarsinnaasoq, aamma suli sungiusarluni aallartissimanngikkaluaraanniluunniit imaluunniit siusinnerusukkut arpattarsimanngikkaluaraanni.

- 1 milemik (1609 meteri), 5 km-imik aamma 10 km-imik arpannissamut kikkut tamarmik qaammatit pingasut ingerlaneranni piareersarsinnaapput.

Powered by Labrador CMS