Royal Greenlandip siuttutut inissisimanini nukittorsaraa
Tunisassiorfissuup Royal Greenlandip Canadamiut suliffeqarfiannik pisinermigut qalerualinnik aalisakkanillu Atlantikup Avannaaneersunik tunisassiortutut nunarsuarmi siuttutut inissisimanini nukittorsarsinnaagaa, qullersap Mikael Thinghuusip isertuutinngilaa.
Royal Greenlandip suliffeqarfik Quinlan Brothers pisiarerusuppaa. Taanna ulluinnarni Quinlanimik taaneqartartoq, Canadami nunap immikkoortortaanni Newfoundlandimi aamma Paggivittami aalisakkanik tunisassiorfiit annersaraat.
Pisortaanerup naatsorsuutigaa, pisiarinissaa aatsaat ukioq ataaseq marlulluunniit qaangiuppata pisinnaassasoq, tassami Canadami aalisakkanik tunisassiorfimmik pisineq pisariusorujussuusarmat. Tamatuma peqatigisaanik coronamik ajornartorsiuteqarnerup isumaqatigiinniarnerit sivitsorsarpai.
Pisortap Mikael Thinghuusip oqaatigaa, Royal Greenland Canadamiut tunisassiorfiannik pisinermigut isumannaallisarsinnaassasoq. Quinlan pingasunik suliffis-suaateqarpoq, New Founlandimi suliffissuit angisuut marluk mikisorlu ataaseq.
Royal Greenland nukittunerulertiguk
- Pisineq iluatsissappat, tamanna Royal Greenlandimut, Kalaallit Nunaannut aamma Newfoundlandimut pitsaalluinnassaaq. Quinlanip pisiarineratigut Royal Greenlandip ajornartoorsinnaanini siamasinnerusunngortissavaa, tamannalu uatsinnut peqqinnarluinnartuussaaq. Atlantikup Avannaaneersunik amerlanerusunik tuniniaasinnaalissaagut, tamannalu tuniniaaffinni nukittunerulernitsinnik kinguneqassaaq, Mikael Thinghuus oqarpoq.
Quinlanip pingaarnertut tunisassiai tassaapput saattuat raajallu, tunisassiorfiup aalisartunit, sinerissamut qanittumi aalisartunit pisiarisartagai. Taakku saniatigut Canadami tunisassiorfiup taassumaaalisakkanit tunisassiat soorlu oquutakkut ilagisaannik pigvarinik aamma havtaskenik.
Quinlan Brothers Amerikamiut nutaarsiassaqartitsiviannit Bloombergimit oqaatigineqartut naapertorlugit tamakkiisumik aamma piffissap ilaannaani sulisartunik 800-nik sulisoqarpoq, Quin-Sea-li 700-t missaannik sulisoqarluni.
Allaaserisaq tamaa Sermitsiami nutaami atuaruk – ugguuna pissarsiariuk: