Royal Greenlandip siulersuisui taarsersorneqartut
Namminersorlutik Oqartussat ingerlatseqatigiiffiutaanni siulersuisunik taarsersuineq suli ingerlanneqarpoq. Royal Greenlandip siulersuisuini ilaasortaasunit arfiniliusunit sisamat sisamanngornermi ataatsimeersuarnermi taarserneqarput.
Kalaallit Nunaanni politikkikkut pissaaneq allanit tiguneqarsimasoq kikkunnit tamani erseqqissumik takuneqarsinnaavoq. Nutaamillu siunnerfeqalersimaneq Namminersorlutik Oqartussat ingerlatseqatigiiffiutaanni siulersuisunut tamanna sunniuteqarsimalluni.
Múte B. Egede Naalakkersuisut Siulittaasuattut nutaamik siunnerfeqalerneq nalunarutigisimavaa, tamannalu Namminersorlutik Oqartussat ingerlatseqatigiiffiutaanni arlalinni siulersuisut nutaanik ilaasortaqalernerannik kinguneqarpoq.
Piiaaneq nutarterinerluunniit?
Ulluni kingullerni ilaasortanik taarsersuineq inuit ilaasa piiaanertut taasinnaavaat, allalli isumaqarput pisariaqartinneqartumik nutarterisoqartoq.
Royal Arctic Line, Tele Greenland, Air Greenland kingullertigullu Royal Greenland siulersuisuni ilaasortaasunit 23-usunit ilaasortanik aqqanilinnik taarsiisimapput, ilaasortat pineqartut sulisunit ilaasortassatut toqqagaasimanngillat. Taamaalilluni ingerlatseqatigiiffissuarni sisamaasuni ataatsimeersuarnerni ilaasortassatut toqqarneqarsimasut 48 procentii taarserneqarsimapput.
Royal Greenlandip siulersuisuini ilaasortaajunnaartut:
- Pernille Fabricius
- Jan H. Lynge
- Niels Smedegaard
- Krissie Berthelsen Winberg
Ilaasortanngortut:
- Maliina Abelsen
- Karsten Høy
- Michael Skorup
- Regine Møller
Niels Harald de Coninck-Smith siulittaasutut ingerlaqqippoq. Taamatuttaaq Tina Lynge Schmidt taarsersuinernit eqqugaanani ingerlaqqilluni.
Nammineq piumasaqaatiminik malinnittoq
Naalakkersuisut Siulittaasuata Múte B. Egedep ataatsimeersuarnerni siullerni pingasuusuni aallarniillu oqaaseqarnermini erseqqissaatigisarpaa, piumasaqaatigineqartoq Namminersorlutik Oqartussat ingerlatseqatigiiffiutaat ”sulisinnaasut najugaqavissut aamma atorfinni qaffasinnerusuni atorfinitsinneqartarnissaannik suli annertunerusumik suliniuteqartariaqartut”.
Piumasaqaat Kalaallit Nunaanni politikkimi siuttunngortup nutaap, Naalakkersuisut Siulittaasuata Naalakkersuisoqarfiani Siulersuisoqarnermut allattoqarfik aqqutigalugu Namminersorlutik Oqartussat ingerlatseqatigiiffiutaannut nalunaarutigiuarsimavaa.
Aamma atuaruk: Mútep Kielsenip Namminersorlutik Oqartussat ingerlatseqatigiiffiutaannut piumasaqaataa uteqqikkaa