peqqissuuneq
Royal Greenlandip meeqqat timersortarnerat tapersersorpaa
Kalaallit Nunaanni Timersortartut Kattuffiata Royal Greenlandimik suleqateqarnerat sivitsorneqarpoq
Royal Greenland meeqqat inuusuttullu peqqissuunissaat siunertaralugu Kalaallit Nunaanni Timersortartut Kattuffiata specialforbundini suliniuteqarnerinut 200.000 koruuninik tapiivoq.
Kalaallit Timersortartut Kattaffiata siulittaasuanit Nuka Kleemannimit Royal Greenlandimi pisortap tullersortaanit Malik Hegelund Olsenimillu isumaqatigiissut atsiorneqarpoq.
- Nuannaarutigaarput Kalaallit Nunaanni meeqqat inuusuttullu timersornissamut periarfissinnissaat suli peqataaffigisinnaagatsigu. Taamaattumillu Kalaallit Nunaanni Timersortartut Kattuffiannut aningaasanik tapiinermik isumaqatigiissummik atsioqatigeqqissinnaagatsigit nuannaarutigaarputtaaq. Qularutiginngilluinnarparput Kalaallit Nunaanni Timersortartut Kattuffiata suliaq ukiuni kingullerni ingerlassimasaata pitsaasumik kinguneqarumaarnissaa. Uagullu Kalaallit Nunaanni Timersortartut Kattuffiata naleqartitai aamma isumaqatigilluinnarpagut tassaasut: Angusat peqqinnermik naleqartitat ataqatigiilluarnikkut, Malik Hegelund Olsen oqarpoq.
Kalaallit Nunaanni Timersortartut Kattuffiannit isumaqatigiissummik atsiortoqarnera nuannarineqarpoq.
- Meeqqat inuusuttullu timersortarnerannut atatillugu ingerlaavartumik ineriartuinissatsinnut pingaaruteqarluinnartoq tassaavoq aamma suliffeqarfissuup taamak angitigisup Royal Greenlandip takusinnaammagu timersorneq tassaasoq peqqissumik inuunermik ingerlatsinerusoq. Royal Greenlandip soorlu erseqqissaaffigigaa anguniakkagut pitsaasut 'Angusat peqqinnermik naleqartitat ataqatigiilluarnikkut' ingerlateqqissavagut, Nuka Kleemann oqarpoq.