Meeqqat pisinnaatitaaffii
Royal Greenlandip meeqqat pisinnaatitaaffii ilinniassavai
Royal Greenland aamma Meeqqat pisinnaatitaaffii pillugit sullissivik MIO suleqatigiinnissamik isumaqatigiipput
Royal Greenlandip Kalaallit Nunaanni sulisuisa 900-usut meeqqat pisinnaatitaaffiinik annerusumik ilisimasaqalernissaat sulissutigissavaa.
Meeqqat pisinnaatitaaffii pillugit sullissiviup MIO-p aamma nunaqarfinni meeqqat pisinnaatitaaffiisa ilisimaneqarnerulernissaat sulissutigineqartariaqartoq isumaqarluni.
MIO-p aamma Royal Greenlandip suleqatigiinnertik allarnisareerpaat Royal Greenlandimi sulisoqarnermi siunnersorti Esther Arens meeqqat pisinnaatitaaffiinik sulisunut ilaqutaanullu oqariartuummik apuussisinnaanissaa siunertaralugu MIO-p ilitsersulereermagu.
Akisussaaffimmik tigusineq
Royal Greenlandip pingaartitaaraa sulisorisami inuttut ineriartortuarnissaat, tassungalu atasumik suliassaq ingerlanneqassaaq, meeqqallu pisinnaatitaaffiinik ilinniartitsineq ilaatigut Royal Greenland Academykkut aamma Royal Kidsinut ingerlanneqassaaq.
- Royal Greenlandimik suleqateqalernerput innuttaasut ilaasa amerlasuut akornanni meeqqat pisinnaatitaaffiinik suli ilisimasaqarnerulernermik kinguneqarumaarpoq. Suleqatigiinneq suliffeqarfiit inuiaqatigiinni akisussaaffeqartumik suliaqartarnerannut takussutissatsia-laavoq, tassalu minnerunngitsumik inuiaqatigiit, meeqqat suliffeqarfimmilu sulisuusut iluaqutissarivaat, meeqqat illersuisuat Aaja Chemnitz Larsen oqarpoq.
Royal Greenlandimi sulisut illoqarfinni nunaqarfinnilu isorliunerusuniittut aamma tikissavaat.
- Takusinnaavara suli meeqqat pisinnaatitaaffeqarnerannik oqariartuummik siaruarterisariaqartugut. Suleqatigiinnitsinni angajoqqaat akisussaasuunerata nukittorsarnissaa akuersaarpalaarluta pimoorutissavarput. Isumaqarluinnarpunga angajoqqaarpassuit sapinngisartik tamaat atorlugu meeqqamik toqqissisimasumik meeraanissaat qulakkeerusuttarmassuk, Aaja Chemnitz Larsen oqarpoq.