Royal Greenlandip isertitai amerliartuinnavipput
Raajat nalingi suli qaffasipput qaleralinnillu tunisaqarluartoqarsimalluni. Taamaattoq Brexit aamma USA-p Kinallu niuernikkut unamminerat kingunerlutitsisinnaavoq
Royal Greenlandimi ukiup affaata siullia angusaqarfiulluarpoq, ukioq kingullermit angusat pitsaanerullutik.
Royal Greenlandip 2019-imi januaarip aallaqqaataaniit juunip 30-ata tungaanut ukiup qiteqqunnerani nalinginnaasumik ingerlatsinermi angusai akileraannginnermi siorna taamaalinerani 50 millioner koruuniullutik maanna 87 millioner koruuniugamik angusaqarfiulluarput.
Raajanik, qaleralinnik aamma saattuanik tunisaqarluarnerup tamanna kinguneraa.
Ineriartorluartoqarpoq
Raajat amerlanerusut tunineqanngikkaluartut akiisa qaffasinnerinsa pissutigisaannik isertitaqarluartoqarpoq.
- Raajat uusut qalipaajakkallu akigissaarnerisa 2018-ip qiteqqutereernerata kingorna attanneqarsimasinnaanerisa kingunerisaannik tunisatigut kinguariaateqarfiugaluartut isertitatigut malunnartumik siuariaateqarfiupput.
- Qalerallit tunisatigut 13 procentinik siuariaateqarfiupput, Canadap kangiani Kalaallit Nunaannilu saattuanik aallussinerit angusatigut 35 procentinik siuariaateqarfiupput.
Aalisakkanik qaqortumik nerpilinnik aalisarneq tunisinerlu aammattaaq Royal Greenlandip angusarissaarneranut peqqutaaqataapput. Barentsip imartaani aalisarluartoqarnera saarulliillu akiisa qaffakkiartornerat isertitaqarnerungaatsiarnermik kinguneqarpoq.
Brexit niuernikkullu unammilleqatigiinneq
Kilisaatit Sisimiut Qaqqatsiallu tunineqarnerini 141 millioner koruuninik iluanaaruteqarnerput nalinginnaasumik ingerlatsinermi angusanut tapertuutaavoq.
Ingerlalluartoqarnerali allanngorsinnaavoq.
- Tuluit Nunaata EU-mit ilaasortaajunnaartussanngornera, USA-p Kinallu niuernikkut akornusersuunneruleratarsinnaanerat nunarsuarmilu aningaasaqarniarnerup ingerlarngata kinguariaateqarfiunera ingerlatseqatigiiffiup iluanaarutaanut sunniuteqarsinnaapput, ukiup affaanut nalunaarummi atuarneqarsinnaavoq.