Suliffeqarfiit
Royal Greenlandip EU-mit taperneqarnera misissorneqartoq
Royal Greenland Glyngøremiittoq Polenimi suliffissanut inerisaanissamut 53 million koruuninik tapertissimavoq. Tapiissutigineqartut uterteqquneqarput
Danmarkimi suliffeqarfiit suliffeqarfitsik annikillisaavigeriarlugit Polenimi suliffinnik inerisaasarput.
Suliffeqarfissuit tallimat EU-miit tapertipput Polenimi suliffeqarfimminnik inerisaanissaminnut atugassaannik.
Fabrikkit suliffeqarfiillu Danmarkimiisitatik matoriarlugit Polenimut suliffeqarfiutertik ingerlateqqippaat.
Polenip siuariartornermut ministereqarfiata aviisimut 3F-imut nalunaarpoq.
Suliffeqarfiit taama ingerlasimasuni Royal Greenland ilaavoq. Illoqarfimmi Polenimi Koszalinimi suliffeqarfissuup inerisarnissaanut EU-mit 53 millioninik tunineqarpoq, kiisalu fabrikki Glyngøremiittoq 2008-mi matullugu.
Suliffeqarfiit assinganik iliuuseqartunut ilaapput Carlsberg, Flügger, Skiold LM Wind Powerilu, Polenimut nuunnerminnut tamarmik EU-mit tapertipput.
EU-milli tapertinnerat unioqqutitsinerusinnaasoq Syddansk Universitetimi EU-mut europallu kangianut ilisimasaqartup Søren Riishøjip ilimagaa.
- Danmarkimi suliffissanik matuseriarluni, EU-mit tapertikkaanni, Polenimullu suliffik nuussimagaanni unioqqutitsinerussaaq, 3F-imut oqarpoq.
Royal Greenland Skioldillu nassuiarusunngilaat sooq EU-mit tapertereernermi kingorna Polenimut nuussimanerlutik.
Suliffeqarfiit Carlsberg, Flügger LM Wind Powerillu EU-mut tapertissimanertik nassuiareerpaat soorlu Polenimut nassuiarlugulu sooq Polenimut nuussimanerlutik. Danmarkimiilli suliffeqarfimminnik ikilisaaniarnartik taama iliorsimallutik oqaatigaat.
EU-miilli tapertittoqarsimanera Mads Andersenip iluarinngilaa.
- Ilumoorsinnaanngilaq EU-miit tapertereernermi nunamut allamut suliffeqarfiit nuussimanerat. Suliffeqarfiit nunanut allanut nuunneqartut unitsinneqarsimasariaqaraluarput, Mads Andersen oqarpoq.
Royal Greenlandip pisumut oqaaseqarumannginnersut paasiuminaatsinneqarpoq.
- Unioqqutitsisoqarsimanera nalileruminaappoq, inatsisilli erseqqilluinnartut takuneqarsinnaapput, tassa suliffeqarfiit tapertereernermi kingorna nunanut allanukaanneqarsinnaanngillat, taamaaliortoqarsimappat unioqqutitsinerussaaq, Sherim Wheeler EU-mi ataatsimiisitaliarsuarmi ilaasortaq oqarpoq.
Ataasiarluni tapiissutigineqartut uterteqquneqarnikuupput, tassa tuluit tiiliofiat Twinings Polenimut nuunnerani EU-miit tapiissutit utertinneqarnikuummata.