Royal Greenlandimut ukioq 2020 ajorluinnarsimasoq

Royal Greenlandip ukiumut angusai, akileraarutit peereerlugit minus 57 mio. koruuniupput, tassa ukiup siulianut sanilliullugu 368 mio. koruuninik ikinnerusut. Kaaviaartitat milliardit affangajaannik ikilisimapput, taamalu 4.849 mio. koruuniullutik.

RG-mi siulersuisut Mikael Thinghuusimik siuttullit uppernarsarpaat, ukioq 2020 raajat qalipallit, uusut qalipaajakkallu aamma qalerallit tunisinermi akii tamarmik 15 aamma 20 procentit akornanni apparsimanerisa malitsigisaannik ukioq 2020 Namminersorlutik Oqartussat ingerlatseqatigiiffiutaannut ilungersunarluinnarsimasoq.

Inuiaqatigiinnut akisussaaffeqarneq

- Nualluut nunarsuarmi tamarmi tuniluuttoq Royal Greenlandip isertitaqarneranut ajoqutaassasoq ukiup aallartinnerani ersarissivoq. Taamaakkaluartoq suliffeqarfik pilersaarutaareersut naapertukannerlugit aalisaannarniarluni, tulaassuiinnarniarluni tunisassiuinnarniarlunilu aalajangerpoq, taamaalillunilu arlalitsigut najukkami aalisakkerinermik suliffeqarfiusartutut pingaarutilittut inuiaqatigiinni akisussaaffimmik attassiinnarpoq.

- Nunani tamalaani niuerfiit annikillineranni pilersuinerullu nalinginnaasumik attatiinnarneqarnerani Royal Greenland taamaalilluni nerorsaqqutitut inissisimavoq, Royal Greenland tusagassiorfinnut nalunaaruteqarnermi ilisimatitsivoq.

Ajornartorsiortoqaraluartoq Kalaallit Nunaanni sulisorineqartut 20-nik ilaneqarsimapput, taamalu sulisut 1.452-inngorsimallutik. Suliffeqarfissuarmi ulloq naallugu sulisartut maannakkut 2.230-upput.

- Sukannernerusumik killilersuineq pisuussutinut pissarsiarisinnaasatsinnut anigoruminaatsumik kingunerloratarsinnaallunilu nunatsinni Canadamilu inuiaqatigiit aningaasaqarnikkut ajornartorsiuteqalernerannik kinguneqarsimasinnaasoq Royal Greenlandimi isumaqarpugut. CSR inuiaqatigiillu piujuaannartitsinermik tunngaveqartut Royal Greenlandimi oqaasiinnaanngillat – inuiaqatigiinnili akisussaaffimmik annertuumik tigusinermut aalajangersimasumik oqariartuutaapput; aamma aningaasaqarnikkut akisugaluarpalluunniit, siulersuisut nassuiaatigaat.

Siunissamut isumalluarneq

Corona nunarsuaup ilaani suli tuniluukkaluartoq, ingerlatseqatigiiffik siunissamut isumalluarpoq, nalilerneqarporlu ukioq manna angusassat 2020-mi amigartooruteqarnermut sanilliullugit 150 mio. koruuninik pitsaanerussasut. Isumalluarnermut ilaatigut tungnaviuvoq, ukiumi kingullermi ingerlatseqatigiiffiup aningaasartuutaasa ikilisinneqaarsimanerat.

Royal Greenlandip kilisaatinut aningaasaliinissatut pilersaarutaareersut attatiinnarniarlugit ilismatitsissutigaa.

- Kilisaat raajarniut M/tr Nataarnaq 2021-ip naanerani tunniunneqartussatut naatsorsuutigineqarpoq, kingullertullu kilisaammik aalisariutissamik M/tr Tuugalimmut taartissamik 2022-mi tunniunneqartussanngorlugu sanatitsinissamut isumaqatigiissusiortoqarpoq, tusagassiorfinnut nalunaarummi allassimavoq.

Aalisakkerinermi suliffissuaqarfik 2020-p aallartinnerani 700 mio. koruuninik akiitsussanut sillimmatissanik taarsigassarsisimavoq. Ilisimatitsissutigineqarporli immikkut ittumik akiitsussatut sillimmatit atorneqarsimanngitsut.

57 mio. koruuninik amigartooruteqarsimanermut ilaatigut tunngaviusimavoq, kilisaammik ikerinnarsiummik taarsiinermi 15 mio. koruuninik annaasaqartoqarsimanera.

Pisortat ajunngitsorsiassaqanngitsut

Aningaasaqarnikkut angusat pitsaanngikkaluartut pilersaarutaavoq, iluanaarutinit 60 mio. koruunit piginnittunut, Namminersorlutik Oqartussanut tunniunneqassasut. Siorna suliffeqarfiup ajornartorsiornera pissutigalugu iluanaarutinik tunniussisoqarsimanngilaq.

Naatsorsuutit allassimaffianni ilisimatitsissutigineqarpoq, 2020-mut naatsorsuutit tunngavigalugit pisortat ajunngitsorsiassaqartinneqanngitsut.