Royal Greenlandimut piumasaqaat: Ukioq manna maani najugaqartunik pisortaqarnissamik pilersaarummik saqqummiissasut

Royal Greenlandimi marlunngornermi ataatsimeersuartoqarnerani ingerlatseqatigiiffiup pisortaasa Kalaallit Nunaanniinnissaanik piumasaqaat qaqinneqaqqippoq. Suliffeqarfik qullersaqarfimmik nutaamik sulisunut amerlanerusunut inissalimmik Nuummi sananissamut piareersimavoq.

- Tamanna tunuliaqutigalugu pilersaarutit qulaani taaneqartut ukioq manna piviusunngortinneqarnissaannik sulissuteqarnissaq, ingerlatseqatigiiffiup siulersuisunut qinnuiginnissutigaarput, aammattaaq ingerlatseqatigiiffik pilersaarutit sumut killinnerannik Naalakkersuisut saqqummiussinnaratik inuiaqatigiinnut aamma saqqummiussissapput, taamatullu saqqummiussaq siulleq kingusinnerpaamik ukioq manna septembarimi tunniunneqassasoq piumasaraat, Múte B. Egede oqarpoq.

Nipisat suaat pillugit saqitsaattoqarnerata kingorna Royal Greenland piffissami kingullermi politikkikkut annertuumik oqallisigineqarpoq. Royal Greenlandip tunisinermut aki nalunaarutigisaa, KNAPK-p akueriumanngimmagu aalisarneq kinguaattoorpoq.

Ilaatigut taamatut pisoqarnerani Siumup Nuummi immikkoortoqarfiata Royal Greenlandimi pisortat taarserneqarnissaannik piumasaqaateqartippaa.

Naalakkersuisut siulittaasuata nipisat pillugit suliaq toqqaannartumik oqaatiginngilaa, kisianni marlunngornermi ataatsimeersuartoqarnerani ingerlatseqatigiiffiup aalisartut ukkatarinerulissagai oqariartuuteqarpoq:

- Aalisarnermi Naalakkersuisut aamma piginnittuunermut politikkip nutaap kinguneranik, ingerlatseqatigiiffiup pilersuisuinik, tassa aalisartunik kattuffiinillu suleqateqarnerup ukkatarinerulernissaa kissaatigaat.

- Tunisinermi pissutsit aamma akit pillugit apeqqutit ingerlatseqatigiiffiup pilersuisuni suleqatigalugit aaqqissavai, Múte B. Egede oqarpoq.

Pisortat Kalaallit Nunaanniittut kissaatigigaat

Royal Greenlandip pisortaasa maani Nunatsinni najugaqarnissaannik anguniagaqarneq, Naalakkersuisut siulittaasuata siorna ataatsimeersuarnermit piumasaqaat aamma uteqqippaa.

Ingerlatseqatigiiffiup pisortaasa Kalaallit Nunaanni najugaqarnissaannik, Royal Greenland pilersaarummi suliaqartoq Múte B. Egedep oqaatigaa, pilersaarutillu ukiamut piareernissaa oqaatigaa.

- Tamanna tunuliaqutigalugu pilersaarutit qulaani taaneqartut ukioq manna piviusunngortinneqarnissaannik sulissuteqarnissaq, ingerlatseqatigiiffiup siulersuisunut qinnuiginnissutigaarput, aammattaaq ingerlatseqatigiiffik pilersaarutit sumut killinnerannik Naalakkersuisut saqqummiussinnaratik inuiaqatigiinnut aamma saqqummiussissapput, taamatullu saqqummiussaq siulleq kingusinnerpaamik ukioq manna septembarimi tunniunneqassasoq piumasaraat, Múte B. Egede oqarpoq.

Piffissap ingerlanerani politikkikkut oqallisigineqartarpoq, ukiorpassuarni pisortaasimasup Mikael Thinghuuusip Danmarkimi najugaqarnera. Ukioq kingulleq ataatsimeersuartoqarnerani Siumumi siulittaasoq Erik Jensen, pisortaanerup atorfinitsinneqarnerani pineqartoq Nunatsinni qullersaqarfimmiissasoq Naalakkersuisut sinnerlugit oqarpoq.

Maanna Susanne Arfelt Rajamand pisortaaninngorpoq, taannalu qaammatini arfinilinni ilaquttanilu Nuummi najugaqassasut maannamut nalunaarutigineqarnikuuvoq.

Qaammatit arfinillit qaangiunneranni ilaquttat eqqarsaatigalugit Sverigemut nuunniarluni, Sermitsiaq.AG-mut oqarpoq, tamatumalu allanngortinnissaa pilersaarutiginngilaa:

- Kisianni Kalaallit Nunaanni annertuumik najuuttassaanga, Susanne Arfelt Rajamand oqarpoq.

Siulersuisuni siulittaasoq: Nuummi qullersaqarfimmik nutaamik sanaartussaagut

Siulersuisuni siulittaasup Maliina Abelsenip pisortat Kalaallit Nunaanni najugaqarnissaannut tunngasoq nalunaarusiamini eqqartorpaa:

- Piginnittut tungaannit pisortat Kalaallit Nunaannit sulinissaat kissaatigineqartoq, siorna ataatsimeersuartoqarnerani oqaatigineqarpoq. Kissaatigineqartoq pissusissamisoorpoq, tamannalu siulersuisut aamma isumaqataaffigaat. Taamaammat aamma allannguisoqassaaq, taamaalilluni pisortat ilaat siunissami Kalaallit Nunaanni najugaqartalissallutik, Maliina Abelsen oqarpoq, nangillunilu:

- Pingaartumik 2023-mi Kalaallit Nunaanni piginnaasalinnik ineriartortitsineq sammineqassaaq. Siunissami aqutsisut Kalaallit Nunaannit sulisarnissaat ersarissumik anguniagaavoq, naak allannguinerit annertuut piffissamik atuiffiusaraluartut. Taamatut allannguinissaq pimoorupparput.

Royal Greenlandip Nuummi qullersaqarfiup nutaap ukioq manna sanaartorneqalernissaa naatsorsuutigigaa, Maliina Abelsenip aamma oqaluttuaraa.

- Maanna qullersaqarfipput ullutsinnut naleqqukkunnaarnikuuvoq, angissusaalu naammanngilaq. Minnerunngitsumik Kalaallit Nunaanni sulisut amerleriarnikuummata aamma amerleqqittussaammata, Maliina Abelsen oqarpoq.

Powered by Labrador CMS