Royal Greenlandimi sulisut suliaminnik unitsitsisut
Royal Greenlandip Aalborgimi tunisassiorfiani sulisut 20-t 30-llu akornanniittut sisamanngornermi ullaakkut suliaminnik atorunnaarsitsipput. Taakku isumaqarput tunisassiorfiup matusussaaneranik ilisimatinneqarsimanatik.
Royal Greenlandip Aalborgimi tunisassiorfiani raajanik poortuivimmi sulisut 20-t 30-llu akornanniittut suliatik ullaaq manna taamaatippaat angerlarlutillu. TV2 Nord nittartakkamini taama allappoq.
Tunisassiorfimmi sulisut, Royal Greenlandip tunisassiorfik Tysklandimut nuutsippagu namminneq qanoq pineqassanerlutik pillugu ilisimatinneqarsimannginnertik iluarinngilaat.
- Sulisut suliffimminnik annaasaqalernertik pillugu ilisimatinneqarsimanertik pillugu iluarisimaarinninngillat. Ilisimasaqarpallaanngillat, suliffeqarfiummi pisortaanera ilisimatitsiinnarsimavoq Aalborgimut februaarip sisamaani aatsaat ilisimatitsiartorsinnaalluni, Benny Vinther Jensen Aalborgimi 3F-imeersoq, Royal Greenlandip sulisuinik peqatigiiffeqartoq oqarpoq.
Niuerfimmut qaninnerulerneq
Royal Greenland tunisassiorfiup Aalborgimiit Tysklandimut nuutsinneqarnissaa pillugu sapaatip akunnerata siuliani ilisimatitsivoq. Aalborgip talittarfiani attartorneq ukiup naanerani naappat atorunnaarsinneqassaaq. Aalborgimi tunisassiorfik 50-it missaannik sulisoqarpoq.
Raajanik poortuineq Tysklandimi Cuxhavenimi ingerlanneqalissaaq, tassani Royal Greenland tunisassanik piareeqqasunik europamut niuerutigineqartussanik poortuisitsisareerpoq.
- Cuxhavenimi tunisassianik nioqqutissiornermi ataatsimoorussinitsigut nukittorsaasinnavugut ilaatigut aamma ininut attartornermi akikinnerusumik akiliisarnikkut, tunisassiornermi pisortaq, Lars Nielsen, Royal Greenlandip nittartagaanni tusagassiutinut nalunaaruteqarluni allappoq.