Royal Greenlandimi ilinniartitsineq iluatsilluartoq
Ilinniartoqarfiit Royal Greenlandillu suleqatigiilluarnerisigut aalisakkanut suliffissuarni inuusuttut amerlanerusut ilinniakkamik aallatittalersut.
Kalaallit Nunaanni suliffeqarfiit annersaat Royal Greenland A/S katillugit 2.200-it missaannik sulisoqarpoq, taakkunanngalu 1.400-it missaat Kalaallit Nunaanni sulipput. Suliffeqarfissuaq nunarsuarni aalisakkanik qalerualinnillu tunisassiortut ataqqineqarpaallu ilagaat, ukiorpassuillu ingerlaneranni nunarsuarmi niuerneq annertuumik ilisimasaqarfigilerlugulu akuuffigisimallugu.
Aviisi Sermitsiaq taama allappoq.
Suliffeqarfissuarli taanna nunarsuarmi sumiiffinni allani assigiinngitsuni immikkoortortaqarfeqartoq, Kalaallit Nunaanni illoqarfinni nunaqarfinnilu amerlasuuni suliffissaqartitsisuullunilu pingaaruteqarluinnartumik inissisimavoq. Tassanilu sulilertartut amerlasuutigut inuusuttuaraallutilli sulilertarput ilinniagaqarsimasuussanatillu. Taamaakkaluartorli taakku ilinniagaqarnissaat pikkorissartuarnissaallu suliffeqarfissuarmiit amerlasuutigut periarfissiissutigineqartarpoq.
Taama oqarput ineriartortitsinermut pisortaq Sara Biilmann Egede aamma ilinniartitaanermut pisortaq Ungaaq Abelsen. Taakku tamarmik Royal Greenlandip Nuummi qullersaqarfiani atorfeqarput.
Ilinniartussarsiorneq iluatsilluartoq
Inuiaqatigiini ilinniarsimasut atorfissaqartinneqarput, taamaattumillu Royal Greenland suliffeqarfiutimini ilinniakkanik assiginngitsunik ilinnialertoqarnissaanut assigiinngitsunik neqerooruteqartarpoq. Ilinniartoqarfiit assigiinngitsut Royal Greenlandilu suleqatigiipput, maannakkorpiarlu Royal Greenlandimi inuit 45-t missaanniittut ilinniartuutigineqarput, taakkulu imarsiornermut tunngasunik nunamiluunniit suliffinnik assigiinngitsunik ilinniartuupput. Ilinniarnerup ingerlanerani suliffimmik misiliilluni sulineq Royal Greenlandimi ingerlanneqartarpoq, atuagarsornerlu ilinniartoqarfinni ingerlanneqartarluni.
- Ilinniartut agguaqatigiisillugu 25-t 30-llu akornanni ukioqartarput, taakkulu suliffimmik misiliilluni sulinissaq siunertaralugu uagutsinnut saaffiginnittarput, aammali ilaanneeriarluni ilinniartoqarfiit toqqaannartumik saaffiginnittarlutik.
- Taamatullu pisoqartillugu uagutsinni ilinnialertussat oqaloqatigisarpagut, ilinniartitaanermut pisortaq Ungaaq Abelsen oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
