misissuineq
Royal Greenlandi namminersortunngorsarneqassanngilaq
Aalisarneq pillugu inuiaqatigiit apersorneqarneranni Roya Greenlandip namminersortunngorsarneqarnissaa amerlanerpaartaasa akerleraat.
Tamanna nalunaarusiami Rikke Becker Jacobsenip Aalborg Universitetimeersup saqqummiussimasaani takuneqarsinnaavoq. Taanna Kalaallit Nunaanni Namminersorlutik Oqartussat ilisimatusarnermi siuarsaanermut aningaasaataannit pilersinneqarpoq.
Oqarasuaatikkut apersuineq
Ilisimatuup ukiarmi Nunatsinni inuiaqatigiit 689-it kinaassutsiminik isertuussisut apersorneqarnerannit nalunaarusiaq 100 missaannik quppernilik pilersinneqarsimavoq, nalunaarusiarlu Nunatsinni aalisarnermut suliniaqatigiiffinnit aalajangersuisartunilli atorluarneqarsinnaalluni.
Apersorneqarsimasunit 64 procentiisa Royal Greenlandip inuiaqatigiinnit pigineqaannarnissaa kissaatigaat.
Paatsuugassaanngitsumik inernerit
Namminersortunngorsaanissamut apeqqutip saniatigut paatsuugassaanngitsumik inerniliunneqarsimapput:
- Nammineq atungassanik aalisarsinnaaneq
- Inuussutissarsiutingalugu aalisarnerup Nunatsinni suliffinnik pilersitsinissaa
- Aalisartut Nunatsinneersuussasut
- Aammattaaq inuiaqatigiit amerlasuut paaserusuppaat aalisagartassiissutinik kikkut pissarsisarnersut sunalu patsisaanersoq. Kikkut tamarmik aamma aalisarnerinnarmik napaniuteqarnissaq akerlerineqarpoq, taamaakkaluartoq aalisagartassiissuutit siammarterneqarnissaat taperserneqarpoq, tassani illoqarfiit nunaqarfiillu siunissami aalisarnikkut iluaquteqarsinnaanerat pineqarluni. Minnerunngitsumilli aalisartunik ikilisaaniarneq ersarissumik akerlerineqarpoq, taakkumi aalisartunut ataasiakkaanut ingerlatsiveqarfiillu pisassiissutinik amerlanerusunik pilersitsisinnaammata, ilisimatuup nalunaarusiaani, inerniliussami allaqqasoqarpoq.
Amerlasuunut sunniuteqarneq
Aalisarnermut politikki immikkut maluginiagassaavoq, tassani innuttaasut affaat tikillugit ulluinnaat sunnerneqartarluni. Taamaattoq sunniuteqarfigineqartut utoqqasaajunerumaarput 40-ut sinnerlugit ukiullit, ilisimatooq allappoq, taanna Aalborg Universitetimi post doc-iuvoq Kalaallit Nunaannilu Silap Pissusianik Ilisimatusarfimmut attuumassutilik.