Royal Greenland tunitsiviliinissamut piareerpoq: Utaqqiisaasumik containerit atorlugit Tasiilami aaqqiissuteqartoqarpoq
Royal Greenland Tasiilami tunisassiorfiliornissaminut piareersarnermini utaqqiisaasumik aaqqiissutissaminik siunnersuuteqarluni qinnuteqaateqarlunilu tunniussereerpoq. Ingerlatseqatigiiffiup maanna utaqqivaa Naalakkersuisut suliarinninnissaat, tamannali utaqqiinnarnagu containerit atorlugit aaqqiissuteqarallarpoq.
Nunatta kangiata imartaani avataasiorluni aalisarneq annertooq ingerlanneqarpoq, sinerissamulli qanittumi aalisarnerup inuussutissarsiutigineqarsinnaanera suli ineriartortinneqarluni.
Ilisimaneqartutut Royal Greenland saarullittassanik immikkut tunineqarnikuuvoq Kangiata Islandillu akornanni avataasiorluni aalisarsinnaasaminik. Pisassiinermut atatillugu piumasaqatigineqarnikuuvoq Tasiilami aalisakkanik suliffissualiortoqassasoq.
Royal Greenland siusinnerusukkut Sermitsiaq.AG-mut erseqqissaateqarnikuuvoq suliffissuup sanallugu aallartinneqarnissaa siusinnerpaamik 2024-mi pisinnaasoq. Taamaammallu suliffissuup tunisassiortup piviusunngornissaata tungaanut piffissaq sivisooq utaqqineqartariaqassammat, Royal Greenland pisussaaffilerneqarnikuuvoq suliffissuup utaqqineqarnerani utaqqiisaasumik aaqqiissuteqaqqullugu.
Naalakkersuisut utaqqisitsipput
Aalisarnermik inuussutissarsiuteqarneq aningaasarsiornikkut annertuumik misikkarissuutitsisuuvoq. Taamaammallu Kangiani innuttaasut politikkimillu suliaqartut kimigiiserput paaserusunneqarluni Royal Greenland qanoq iliuuseqarniarnersoq.
Royal Greenland maanna aaqqiissutaagallartussatut missingiummik tunniussaqareernikuuvoq. Sermitsiaq.AG-mit paasisavut naapertorlugit aalisarnermut piniarnermullu naalakkersuisoqarfimmit Royal Greenlandip aaqqiissutaagallartussatut qinnuteqaataa suliarereersimavaa, taamaammallu Naalakkersuisunut isummerfissiamik tunniussisoqarsimalereerluni, taannali suli naalakkersuisut ataatsimiinneranni oqaluuserisassatut ilanngunneqarsimanngilaq.
Containerit marluk
Royal Greenland Sermitsiaq.AG-mut ilumoorneraavoq aaqqiissutaagallartussatut missingiut qinnuteqaatitalik tunniunneqareersoq, taamaattorli politikkikkut aalajangerniartarnerit utaqqinarsinnaasarmata, ingerlatseqatigiiffik utaqqiisaasumik aaqqiissutissami inissinneqarnissaata tungaanut aaqqiissutaagallartumik iliuuseqarsimavoq:
- Nalunngilarput nunap immikkoortuani aalisarnermik ingerlataqartut aaqqiissutartoqarnissaa pisariaqartikkaat. Taamaammat aalajangernikuuvugut utaqqiisaasumik aaqqiissutissatta inissinneqarnissaata tungaanut utaqqiisaagallartumik aaqqiissutissamik iliuuseqassalluta. Tassalu containerit marluk pissarsiarinikuuvagut. Aapppa aalisakkanut tunineqartunut sikulerlugit nillataartitsivissaq aappaalu allaffiugallartutut atugassaq, tassanilu aalisartut ingerlatseqatigiiffiullu akornanni pisussaaffiit isumagineqartassapput, Royal Greenlandimi tunisassiornermut pisortaq, Lars Nielsen Sermitsiaq.AG-mut oqarpoq.
