Royal Greenland Sulisitsisuni ilaasortaajunnaarsimasoq
Royal Greenland sulisitsisut peqatigiiffiani Sulisitsisuni (GE) ilaasortaajunnaarsimavq, Sulisitsisut taamaalillutik suliffeqarfiit annersaat ilaasortanilu akiliuteqarnerpaasartoq annaavaat.
Pisassiissutaasartut isumaqatigiinngissutaanerat pissutigalugu Royal Greenlandip pisortaanerata Mikael Thinghuusip, Kalaallit Nunaanni suliffeqarfiit annersaat 2.000-it sinnerlugit sulisulik Kalaallit Nunaanni Sulisitsisuni ilaasortaajunnaarsissimavaa.
Pisortap ilaasortaajunnaarneq itisilerlugut imatut oqaatigaa:
- Isumaqarpunga ilaasortaajunnaarallarnerput peqqinnartupilussuusoq. Sulisitsisut sulisullu kattuffiisa ataatsimut unammilligassarisartagaannik anguniagaannillu oqaloqatigiittoqarsinnaanera tunngaviatigut isumaqataaffigaara, Mikael Thingsuus Sermitsiaq.AG-mut oqarpoq.
Isummat
- Nungusaataanngitsumik aalisartoqarnissaa isumaqatigiiffigaarput. Pisassiissutinulli tunngatillugit assigiinngitsunik isumaqarpugut. Isumanga malillugu Sulisitsisut tassunga atatillugu apeqqusiisartussaanngikkaluarput, tassani isummat assigiinngitsuunerat aamma peqatigiiffiup suliassanik ataatsimoorfiusinnaasunik suliaqartussaanera pissutigalugit, Royal Greenlandimi pisortaaneq oqarpoq.
Taassuma oqaatigaa, piginnittuuneq tunngavigalugu taamatut aalajangertoqarsimasoq, tassa Royal Greenland Namaminersorlutik Oqartussanit pigineqarnera aamma suliffeqarfiit allat namminersortunit pigineqarnerat pissutigalugu.
- Piginnittut apeqqutaatinnagit aalisarnerup ingerlaqqinnissaanut tamatta ataatsimut soqutigisatta suleqatigiissutigineqarnissaat tunngaviusussaavoq, Mikael Thinghuus. erseqqissaavoq
Sipaaruteqarniarneq pineqanngitsoq
Pisortaanerup oqaatigaa, taamatut aalajangernermi ukiup coronap atuuffia suliffeqarfimmut akisusimaqisoq pissutigalugu aningaasanik sipaarniartoqarnera pineqanngitsoq.
- Sulisitsisut ilaasortaanni suliffeqarfiit annersarimmatigut ilaasortatut akiliuteqarnerpaasarpugut, taakku ukiumut millionit affaasa missaannik annertussuseqartarput. Oqaatigissavarali ilaasortaajunnaarnitsinnut aningaasat tunngaviunngimmata, Mikael Thinghuus erseqqissaavoq.
Royal Greenlandimit taamatut aalajangertoqarnera, Brian Buus Pedersen 2020-mi novembarip qaammataani pisortaajunnaarmat pisortanngortumut nutaamut Christian Keldsenimut nuannerpallaarunanngilaq. Sulisitsisut siulersuisuanni siulittaasoq Henrik Leth Polar Seafoodip siulersuisuini siulittaasutut atuuffeqarnermini raajartassiissutit siunissami qanoq agguaanneqartarnissaannik soqutigisaqartuuvoq. Pisassiissutinik agguaassisarneq ilaatigut Aalisarneq pillugu Ataatsimiititaliarsuarmit pilersaarusiorneqaleruttorpoq, pilersaarut politikkerinit isummerfigineqartussaavoq.
Ilaasortaajunnaarneq
Mikael Thinghuusip ”ilaasortaajunnaarneq” itisilerlugu oqaatigaa, Sulisitsisut ilaasortamik ataatsimut soqutigisaannik sulissuteqartalissappata kingusinnerusukkut peqatigiiffimmut ilaasortanngoqqissinnaallutik.
Sulisitsisut nittartagaanni atuarneqarsinnaavoq, suliffeqarfiit 350-it missaanniittut 7.000-it missaannik sulisullit soqutigisaqaqatigiiffimmi ilaasortaasut. Royal Greenland 2.000-it sinnerlugit sulisoqarmat, ilaasortaajunnaarneq Sulisitsisut suliffeqarfinnut assigiinngitsunik qulinik suliaqartunut peqatigiiffittut sunniuteqarsinnaaneranut akorngusiisinnaavoq, suliaqarfiit ilagaat ”aalisarneq avammullu niueruteqartarneq”.
Qitiutillugit suliat sisamat
- Soqutigisaqaqatigiiffittut Sulisitsut inuussutissarsiortunut pitsaanerpaanik sinaakkusiortoqarnissaa anguniarlugu naalakkersuinermik suliaqartunik sunniiniartarpoq. Siunnersuisoqatigiinni, ataatsimiititaliani aalajangiisartunilu aalaakkaasuni 20-ni Namminersorlutik Oqartussat ataanniittuni Sulisitsisut sinniisuutitaqarpoq, soorluttaaq aamma Namminersorlutik Oqartussat inatsisissanik piareersaanerani tusarniarneqarsinnaalluni. Qitiutillugit suliarisartagai allat tassaapput isumaqatigiissutitigut atugassarititaasut, inatsisitigut aningaasaqarnikkullu siunnersuisarneq kiisalu inuussutissarsiutinik inerisaanermi siuarsaaneq.