Royal Greenland siuariaateqarfii
Royal Greenland Asiami tunisaqarluarsimavoq. 2018-imimi kaaviaartitani 30 procentii Asiaminngaanneerput, tamanna ukiut tallimat ingerlanerinnaani 50 procentimik qaffariaataavoq.
Royal Greenlandimi aqutsisut niuffaffiit pingasut annertunerusumik tunisaqarfiusimasut tikkuarpai: Asia, Amerika Avannarleq aamma Skandinavia. 2017-imut sanilliullugu Skandinaviami tunisat 3 procentimik qaffariaateqarsimapput kaaviaartitallu 24-ulerlutik.
Amerika Avannarlermi aamma siuariaateqarfiuvoq 2017-imi 5 procentiusamalluni 2018-imi 8 procentinngorsimalluni.
Europa kinguariarfiusoq
Illuatungaanili Europami ingerlalluarfiuallaanngilaq, tassani 46 procentimiik 37 procentimut appariaateqarsimalluni.
- Europamulli tunngatillugu Tuluit Nunaat immikkut taassallugu tunngavissaqarpoq, tamatumanimi tuluit aningaasaasa nalingat apparaluartoq DKKnngorlugit kaaviiaartitat 8 procentinik amerlisimammata, ukiumoortumik nalunaarusiami allassimavoq.
Naak Kina-mi ineriartorneq ataatsimut isigalugu appariartoraluartoq Asiami tunisat 1,5 milliarder koruuniupput.
- Ingammik raajat qalipallit tunisatigut siuariaateqarfiupput, tamatumani tunisat 2017-imi tunisanut sanilliullugit 75 procentimik siuariaateqarfiusimammata. Tamatumani siuariaateqarneq Ruslandimi niuernermi kinguariaatinik matussusiinermut tunngaviulluinnarmat raajat qalipallit akiinik aalajangiinermut pingaaruteqarsimavoq. Qalerallit akiisa qaffalaarnerannik malitseqartumik tunisatigut aamma siuariaateqarfiulluarput.
- Ataatsimut isigalugu Kina Taiwanilu tunisatigut siuariaateqarfiulluarput, pissuseqatigiiaanillu nutaanik soorlu saattuanik saarullinnillu niuerfinni taakkunani niuerutigineqarpiartarsimanngitsunik tunisiffiusalerput.
Japanimi pilersuisuni siuttoq
Raajanik, qaleralinnik saattuanillu pingaarnertut tunisassianut tunngatillugu Royal Greenlandi Japanimi neriniartarfinnut sushinik sassaalliisartunut nunarsuarmi pilersuisuni siuttuuvoq.
- Neriniartarfiit ingerlatsinikkut Japanip avataani siammarternerisa ilutigisaannik tunisassiat pineqartut Japanimut nunanullu allanut tunineqartarput, siulersuisut allapput.
- Sushiliassanik tunisassiornerit pitsaassutsimut piumasaqaatit sukannersut tunngavigalugit ingerlanneqartarput, tamatumanilu Royal Greenlandip Japanimi pitsaassusilerinermut nakkutilliisui najuuttarput. Sushiliassanik tunisassiorfinnik nunani allani pilersitserusunnarpoq, tamatumanili tunisassioriaaseq immikkuullarilluinnarmat tunisassiorfinnik sumiiffinni allani pilersitsinissaq ajornakusoorpoq, RG-mi aqutsisut erseqqissaapput.