Royal Greenland millioninik pingasunik kisitsisitalinnik sinneqartooruteqarpoq

Aningaasartuutit qaffakkiartoraluartut aalisarnermik ingerlatsivissuaq Royal Greenland Namminersorlutik Oqartussanit pigineqartoq 2022-mi akileraannginnermi 235 mio. kr.-nik sinneqartooruteqarluni angusaqarpoq.

Angusat taamaalillutik 2021-mit 326 mio. kr.-sunit appasinnerupput. Tamannali naammagisimaarnarpoq, ingerlatseqatigiiffiup pisortaanera oqarpoq:

- Ukiumi angusat naammagisimaarnartut pissuseqatigiiaanik nunatta imartaaneersunik aallussatsinnik, ingerlalluarsimasunik, tunngaveqarput. Aallussat tuniniaanerup Covid-19-ip tuniluunnerata nalaani unammillernartoqangaatsiarsimagaluartut kingorna 2021-ip naanerani siuariartuinnarsimapput, Royal Greenlandimi pisortaaneq, Susanne Arfelt Rajamand, tusagassiuutinut nalunaarummi oqarpoq.

Royal Greenland naapertorlugu raajat qalipallit, uusut qalipaajakkallu aamma qalerallit isertitaqaataanerat nalinginnaasumut uteqqissimavoq, aammattaarlu saarullinnik aallussaqarneq annaasaqaataagaluartoq allaat siuariaateqarsimavoq.

Kaaviiaartitat 100 mio. kr.-t taamaatinneqartut

2022-mi nukissiutitigut akit qaffasipput, taakkulu Royal Greenlandimut aningaasartuuteqarnerulersitsinermik kinguneqartitsipput:

- Ineriartorneq tamanna aningaasap naleerukkiartungaatsiarneranik peqquteqarpoq, ingammillu Ruslandip Ukrainemik tiguaanerata kingunerisaanik nukissamut akit qaffakkiartornerannik peqquteqarpoq. Qaammatini kingullerni ingerlanerliortoqalermat ajornartoorneq niuerfinni Europamiittuni nalorninartoqalersitsivoq, Susanne Arfelt Rajamand nassuiaavoq.

Pisut Royal Greenland sunnerpaat, Europa suliffeqarfissuarmut niuerfiit pingaarnerit ilaanniimmat, tassanilu aamma russit niuerfiannut tunisinerit tamarmik unitsinneqarneranni 100 mio. kr.-nik kaaviiaartitanik taamaatitsisoqartoq oqaatigineqarpoq.

Saattuat unammillernartoqartut

Royal Greenland aammattaaq Amerikap Avannaani niuerfimmi unammillernartoqartitsivoq, tassani saattuanik tunisineq annertuumik appariarsimavoq:

- Amerikami Avannarlermi tunisassiassat akiisa qaffasinnerujussuat niuerfiillu tunisaqarfiunerisa appariaateqarnerat peqqutigalugu tuniniaaneq unammillernartoqarpoq. Igaffissuaqarfinni niuertarfeqarfinnilu piserusussuseq annertuumik apparmat akit 2021-mut sanilliullugit 50 procentimiit annerusumik apparput, Susanne Arfelt Rajamand oqaluttuarpoq.

Taanna Mikael Thinghuusip siorna septembarimi ukiut qulit sinnerlugit ingerlatseqatigiiffimmi pisortaareerluni tunuarnerata kingorna Royal Greenlandimi pisortaaninngorpoq.

Akiligassat annertuumik qaffattut

Akiligassat 900 mio. kr.-t missaannik qaffassimasut, Royal Greenlandip 2022-mi ukiup affaanut nalunaarusiaanut atatillugu saqqummiunneqareerpoq. Pissutsit taakku aamma ingerlatseqatigiiffiup ukiumoortumik nalunaarusiaani oqaatigineqarput, akiligassat katillugit ukiumi kingullermi 1 milliardinik amerlisimammata:

- Saattuanik tunisassiornerup ineriartornera aningaasartuutillu qaffakkiartornerat eqqarsaatigalugu aningaasanut ingerlatsinermi atukkanut aningaasartornerusoqarlunilu taamaalilluni akiitsunut ernialersukkanut aningaasartortoqarneruvoq, Royal Greenland taarsigassanut tunngatillugu allappoq, nangillunilu:

- Kilisaatinik avataasiutinik taarsersuinermut pilersaarummut ingerlasumut atatillugu aningaasartuutit ukiup siuliani 1,9 mia. DKK-jusimasut 2022-p naanerani 2,9 mia. DKK-jupput.

Namminersorlutik Oqartussanut 73 mio. kr.-t

Ukioq manna sinneqartooruteqartoqarnerani Namminersorlutik Oqartussat 73 mio. kr.-nik pissarsiaqarnissaq naatsorsuutigissavaat, taakkulu akileraareernermi sinneqartoorutit affaraat.

Naatsorsuutit naapertorlugit Royal Greenlandip nammineq aningaasaatai 1.829 mio. kr.-upput.