Skip to main content

Royal Greenland Kinameersunik sulisortaalerpoq

Siorna aasami sulisussaaleqereerluni Royal Greenland suliffissuarni sulisussanik Kinamiit tikisitsilerpoq

Kommuneqarfik Sermersooq Royal Greenlandip qinnuteqataanut tamakkiinngikkaluamik akuersivoq Kinamiit sulisussanik tikisitsinissaq qinnutigineqarmat. Kinamiit sulisussarsinissamut qinnuteqaat Qaasuitsup Kommuniata itigartippaa allalu qinnuteqaat suli akinagu.

Tunisassiornermi immikkut ilisimasallit tallimat Paamiuni ulapaarfiup nalaani atorfinissinnaanngorput. Tunisassiornermi immikkut ilisimasallit tallimat aalajangersimasumik atorfeqalersinnissaannut qinnuteqaat Qaasuitsup Kommuneata itigartippaa, Royal Greenlandillu tunisassiortunik immikkut ilisimasalinnik qulinik Uummannami atorfinitsitsinissamik qinnuteqaataa suli akineqanngilaq.

- Kommuneqarfik Sermersuumit tusarluarnartumik akissutisisimanerput nuannaarutigeqaarput. Kommunip qinnuteqaatitsinnik akuersinermigut takutippaa ulapaarfiup nalaani sulisussaaleqisarnitsinnut paasinninnini. Maannalu Kinamiut tallimat Paamiuni ulapaarfiup nalaani atorfinitsissinnaalerpagut, tunisassiorfimmilu ataavartumik tunisassiornissamut ikiuutissapput, Sulisoqarnermi Pikkorissaasarnermilu Ingerlatsisoq Søren Olsen Damgaard oqarpoq.

Suleqatit ilinniartinnerat
Tunisassiornermi immikkut ilisimasallit ilaatigut sulisunik ilinniartitsisartussaapput, ingerlaatsinik pitsanngorsaallutik sulisullu suliaminnik tanngassimaaruteqalernissaannut paasinninnerulernissaannullu aqqutissiuisussaapput taamalu tamanut nuannaarutaasumik iluaqutaasumillu Royal Greenland A/S-imi sivisunerusumik atorfeqarnissaminnut kajuminnerulernissamik kinguneqassalluni.

- Royal Greenlandimit kommunit marluk sivisujaami pitsaasumillu attaveqarfigilluarsimavagut. Kalaallit Nunaanniilli qinnuteqartut ikittuinnaat akornanni piukkunnartunik ajoraluartumik nassaarsinnaasimanngilagut, naak siammasissumik nittartagarpullu ilanngullugu ussassaaruteqarsimagaluarluta aammalu suliffissarsiuussisarfinni allagarsiivinni nivinngaasimagaluarluta, Søren Olsen Damgaard oqarpoq nangillunilu:

- Qasigiannguani tunisassiornermi immikkut ilisimasalinnik tallimanik aalajangersimasumik atorfinitsitsinissamik qinnuteqaaterput itigartinneqarmat pakatsissutigeqaarput. Qaasuitsup Kommunia maanna qinnuigaarput qinnuteqaaterput misissoqqillugu itigartitsininertik nalilersoqqissagaat, taamaasilluta suleqatigiilluta siuarsaallutalu ineriartortitsiniassagatta aammalu piginnaasanik qaffassaalluta. Aamma neriuutigaarput kommunip taassuma tunisassiornermi immikkut ilisimasalinnik qulinik Uummannami ulapaarfiup nalaani atorfinitsitsiniarluta qinnuteqaaterput ilassilluarumaaraa.

Sulisussarsiorneq iluatsinngitsoq
Royal Greenlandip siorna Kalaallit Nunaanneersunik aasaanerani suliartortitsinera iluatsingaanngilaq, suliartortitat ilarpassui suliffimminnik nakkutiginnissinnaanngimmata, pingaartumik inuttut ajornartorsiuteqarnertik pissutigalugu.

- Royal Greenland A/S-imut pingaartuuvoq erseqqissassallugu tunisassiorfitsinni sulisoqaratta amerlasuunik aalajaatsunik pikkorissunillu aammalu siorna suliartortitatut atorfinitsitagut aalajaatsut nuannaarutigisimaqigatsigit. Inuiaqatigiilli paasisariaqarpaat tunisassiorfinni ulapaarfiusarnerit aasaanerani sulinngiffeqarnerup nalaani pisarmata sulisutta ilarpaaluisa sulinngiffeqarnerisa nalaanni sulisunillu amerlanerusunik pisariaqartitsinitta nalaani. Ulapaarfiullu nalaani tunisisinnaaneq killilersorneqarani ingerlasinnaassappat sulisut amerlinissaasa pisariaqarnera avaqqussinnaanngilarput.

- Qasigiannguanut Kinamiunik ukiut arlalialuit matuma siorna tikisitsisimanerput misilittagaqarfigilluarparput. Kinamiut ajunngitsuinnarnik misilittagaqarfigaagut, taakkulu najukkaminni toqqissisimasumik akuulerput. Taamaammat Kinamiut tikisitassatta tikinnissaannut qilanaalereerpugut, Søren Olsen Damgaard oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER