aalisarnermut inatsit
Royal Greenland: Inuiaqatigiit pisassiissutaat iluatsitsisut ikittuinnaat iluaqutigissavaat
Aalisarnermut inatsisissatut siunnersuut akuersissutigineqarpat tamanna Royal Greenlandip naatsorsuutaanut annertuumik kinguneqassaaq, taamalu inuiaqatigiinnut, selskabimik piginnittunut, pisortaq Mikael Thinghuus naliliivoq.
Aalisarnermut inatsisip allannguutissaa Naalakkersuisut akuersissutigitissappassuk tamanna Kalaallit Nunaanni ingerlatsiviit annersaannik, namminersorlutik oqartussanit pigineqartumik Royal Greenlandimik, eqquissaaq, taamaasillunilu inuiaqatigiinnik innuttaasunillu 56.000-inik piginnittuusunik eqquissalluni. Pisortaq Mikael Thinghuus taama oqarpoq.
Royal Greenlandimut ajornartorsiutaassasoq
Aviisi AG taama allappoq.
– Ullumikkumut sanilliullugu allannguuterpassuaqarpoq, tamakkualu sungiunniarnissaannut piffissamik pisariaqartitsisoqassaaq. Pisassalli agguataarnerisa allanngortinneqarnissaannut tunngasoq Royal Greenlandimut ajornartorsiutaassaaq, tamanna qularutissaanngilaq, Mikael Thinghuus oqarpoq.
Taassuma tupigusuutigaa politikerit sooq amerlasuut arsaarlugit ikittuinnarnut tunniussiniarnerat.
– Ilaanneeriarluta immaqa puigortagarput tassaavoq Royal Greenland Namminersorlutik Oqartussanit pigineqartoq, taamalu innuttaasunit 56.000-init tamanit. Aamma immaqa puigorneqartarpoq aningaasat raajartassiissutitigut iluanaarutivut inuiaqatigiinnut tamanut iluaqutaasut, aningaasaliissutitigut suliffissatigullu. Ullumikkut 1.400-nik tamakkiisumik sulisoqarpugut, ukiualunnguit matuma siornatigut 800-innarnik sulisoqarsimalluta. Tamatuma saniatigut Namminersorlutik Oqartussanut agguagarsisitsisarpugut, atuarfinnut, peqqissutsimik suliaqartunut, attaveqarnermut il.il. atorsinnaasaannik, Mikael Thinghuus oqarpoq.
Pisassat tuniniarneqartariaqassasut
Inatsit akuersissutigineqassappat Royal Greenlandip pisassami ilai tunisariaqassavai, Namminersorlutillu Oqartussat inatsisissatut siunnersuummut oqaaseqaatitigut ersissutigaat tamanna pisinnaasoq akikinaarlugit.
– Pisassiissutimmi allatut agguataarnerisigut tunngavissaavoq pisassiissutigineqartut tunineqarnissaat. Tuniniaavimmilu akit inorlugit tunineqassappata innuttaasunit 56.000-init naleqartitat arsaarinnissutigineqassapput, pisassallu tunisariaqakkavut iluatsitsisunut ikittuinnarnut tunniunneqassapput. Qanoq isilluni tamanna silatusaarnerunersoq takujuminaatsippara, pisortaq oqarpoq.
Assigiinnginneq
Naalakkersuisut naapertorlugit taamaasiortoqarniarunarpoq inuiaqatigiinni assigiinngissuteqarneq akiorniarlugu?
– Takujuminaatsippara tamanna qanoq isilluni anguneqarsinnaanersoq, tassa selskabimit inuiaqatigiinnit tamanit pigineqartumit tiguseriarluni inuiaqatigiinni ilaasortanut ataasiakkaanut tunniullugit. Uannut killormoornerusutut isikkoqarpoq, taanna oqarpoq.
Michael Thinghuusip apersorneqarnera tamaat aviisimi AG-mi atuaruk, taanna uani ataani digitaliusumik atuarsinnaavat. Aalisarnermut inatsisip nutaap kingunissai pillugu aviisimi allaaserisat arlaqarput.