Royal Greenland internetsikkut saassunneqarnermi kingorna siuariarsimasoq

Royal Greenlandimi sulisut immikkullu ilisimasallit arlallit juullikkunni immikkut ittumik suliaqarsimanerisa malitsigisaannik ingerlatseqatigiiffiup aningaasarsialeriffia ajunngitsumik ingerlaqqilersimavoq.

Royal Greenlandi sapaatip-akunnerini kingullerni internetsikkut saassunneqarnerup kingunerinik aaqqiissuteqarniarluni sorsuuteqarsimavoq.

Saassussisoqarnerata malitsigisaanik ingerlatseqatigiiffiup kingullermik aningaasarsisitsisoqarmat sulisut aningaasarsitikkallarsimavai, ingerlatseqatigiiffiup aningaasarsialeriffiata aningaasarsiassat eqqortumik naatsorsorsinnaasimanngimmagit.

Ajonartorsiullu maanna aaqqiiffigineqarsimalluni:

-Tassa sineriammi sulisut annikippallaamik annertuallaamilluunniit aningaasarsitinneqarsimasut, aningaasarsiassaat kingullermik aningaasarsisimanerannut naleqqussarneqassapput.

Sulisut qujaffigineqartut

- Sulisorpassuit juullikkunni sulinngiffissaqaraluarnerminnut taarsiullugu atortorissaarutitta ingerlaqqilernissaannik suliaqarsimanerannik nuannaaruteqarlutalu qujaffigerusuppavut, Masaana Egede Royal Greenlandimi attaveqartarnermut pisortaq oqarpoq.

Attaveqartarnermut pisortap ilanngullugu nassuiaatigaa, Royal Greenland internetsikkut saassunneqarsimanerminit suli sunnerneqaqqasoq, atortorissaarutilli eqqugaasimasut amerlanersaat maanna atorneqarsinnaaqqilersimasut oqaatigalugu.

- Tunngaviatigut atortorissaarutivut tamaasa qamitersimavagut, ataasiakkaarlugillu aallarteqqittarlugit. Tamanna maanna suliarivarput, Masaana Egede oqarpoq .

Taassuma ilanngullugu ilisimatitsissutigaa, internetsikkut saassunneqarnermut atatillugu saassussisimasunit aningaasanik Royal Greenland akileeqquneqarsimanersoq imaluunniit saassunneqarsimaneq qanoq akeqarsimanersoq pillugit oqaaseqarsinnaanani.