Royal Greenland internetsikkut akorngusersorneqartoq

Royal Greenland ullormi kingullermi internetsikkut akorngusersuisoqarnerata kinguneranik it-kkut allatigullu attaveqaatitigut ajornartorsiuteqalersimavoq.

Royal Greenland internetsikkut akorngusersorneqarpoq, suliffeqarfissuup attaveqaatinut pisortaa Masaana Egede sermitsiaq.AG-mut taamatut ilisimatitsissuteqarpoq.

Suliffeqarfiup qanoq akorngusersorneqarnertik imaluunniit politiit akuliunneqarsimanersut maannakkorpiaq ilisimatitsissutigisinnaannginnerarpaa.

- It-mut immikkoortortaqarfitsinni sulisut ajornartorsiut aaqqiiffiginiarlugu tamaviaarlutik sulipput, maannakkorpiarli e.mailikkut oqarasuaatitigulluunniit attaveqarfigineqarsinnaanngilagut. Sullitavut suleqatigisartakkavullu facebook tusagasssiorfiillu aqqutigalugit ilisimatittassavagut, Masaana Egede oqarpoq.

Akorngusersuinermut suna pissutaanersoq ilisimaneqanngitsoq

Internetsikkut akorngusersuiqarnerata kinguneranik maannakkorpiaq akiliuteqartoqarsinnaanngilaq, tunisisarnerli nalinginnaasumik ingerlanneqarpoq - taamaallaat allatut ingerlatsilluni.

- Tunisinermi qangatut pappialaq aqerluusarlu atorneqarpoq, attaveqaatubyt pisortaq oqarpoq.

Internetsikkut akorngusersuisoqaraangat sunaluunniit pissutaasinnaavoq.

Assersuutigalugu virusiusinnaavoq imaluunniit malwareusinnaalluni, akorngusersuutigineqartartut assigiinngitsuusinnaapput, soorlu Trojans, worms virusilu suliffeqarfiup qarasaasiaataanik ajoquseeriarlutik atortorissaarutaannut ingerlaqqillutik ajoqusiisinnaasut, imaluunniit ransomware atorlugu "suliffeqarfiup fiiliinik tiguaariarlutik", peeqqinnissaanut aningaasanik piumasaqartoqarsinnaavoq.

Internetsikkut akorngusersuinermut pissutaasut assigiinngitsuusinnaapput, Royal Greenlandimiilli qanoq soorlu taamatut pisoqarnersoq suli ilisimatitsissutigineqarsinnaanngilaq.

Internetsikkut akorngusersuinermi anguniagarineqartartunut assersuutit

  • Nalunaarsuutinik tillinniarneq
  • Paasissutissanik nalunaarsuutinillu ajoqusiiniarneq
  • Nalunaarsuutinik allannguiniarneq
  • Qarasaasianik atorunnaarsitsiniarneq
  • Aningaasatigut iluanaarniarneq
  • Isertortumik alapernaarsuiniarneq
Powered by Labrador CMS