Royal Greenland Ikerasammi qerititsivimmik alliliisoq

Royal Greenlandip Ikerasammi tunisassiorfiata silataani ulapputtoqarnera arajutsineqanngilaq. Nivattaatimmi qerititsiveqarfiup ilassutissaata toqqavissaa piareersarlugu assaalersimapput. Qerititsivimmi uninngasuutigineqarsinnaasut ullumikkut 80 tonsiupput, ilassutissaalu ukiamut naammassippat qerititsivimmiitinneqarsinnaasut marloriaatinngortinneqarsimassapput. Taama Royal Greenlandip tusagassiisartua Káte Hansen suliffeqarfiup nittartagaani tusagassiorfinnut nalunaarummi allappoq.

- Qerititsivipput pingaartumik ukiuunerani ulikkaapallattarpoq, aasaaneranilu umiarsuaqartarnera akulikinnerusaraluartoq qerititsiveqarniarneq aamma aasaanerani ajornartartorsiutigisarparput. Taamaammat aalisakkanik amerlanerungaartunik ukiamut tulaassuisinnaalernissarput qilanaaraarput, Niels Ole Møller Qeqertarsuup tunuani qalerallerinermi ingerlatsisoq tusagassiorfinnut nalunaarut naapertorlugu oqarpoq.

Ikerasammi tunisassiat ullummikkut 10 tonsit ulloq unnuarlu naammassineqarsinnaapput. Qerititsivimmili inissaq apeqqutaatillugu aalisakkat tulaassorneqarsinnaapput, tassami annertussuseq eqqarsaatigissagaanni nerpinnik tunisassiat amerlanerit qeritinneqarsinnaapput qalerallit ilivitsut annertunnginnerusinnaallutik.

Ikerasammi tunisassiorfimmi suliassakitsillugu marlunnik sulisoqarsinnaavoq ulapaartoqartillugulu 25-t angusinnaallugit. Qerititsiviup ilaneqarnera sulisut amerlinerannik kinguneqassanngitsoq, Káte Hansen paasissutissiivoq.