Royal Greenland hashimik nassaartoqarsimaneq pillugu: Ajuusaarnarlunilu pakatsinarpoq

Siullermik nalunaarutigineqarpoq 21 kilo nassaarineqarsimasoq, politiilli paasissutissaatai kingulliit malillugit Royal Greenlandip kilisaataataani Avatami hashi 23 kiilup missaaniittoq nassaarineqarsimavoq.

Kilisaat Frederikshavnip amutsivianiissimavoq, kilisaatillu aallanngilaattaani hashi politiinit nassaarineqarsimalluni.

Royal Greenlandimi tunisassiornermut pisortap Lars Nielsenip ajuusaarutigaa, kilisaatip anngiortumik eqqusseriarnermut atorneqarniarsimanera:

- Tamanna soorunami ajuusaarutigilluinnarlugulu pakatsiffigilluinnarparput, aappaatigulli imatut tupaallannanngilaq, Lars Nielsen oqarpoq.

Oqartussanut nalunaaruteqartarneq ileqquusoq

Pisortap oqaatigaa, Kalaallit Nunaannut hashimik anngiortumik eqqussisartut aningaasatigut iluanaaruteqarujussuarsinnaasut, taamaammallu kilisaat anngiortumik eqqussinissamut pinerluuteqartartunut aqqutissatsialattut isigineqartartoq.

Tunisassiornermi pisortap oqaluttuaraa, Royal Greenlandimit ileqqorineqartoq, umiarsuaq umiarsualivimmit Kalaallit Nunaata avataaniittumit aallartinnagu oqartussanut misissuiffigeqquneqartarnera, tassani Royal Greenlandip umiarsuaatai atorlugit nunamut anngiortumik eqqussisoqarsinnaanera pinngitsoortinniarlugu:

- Suleqatigiittarpugut, piumasarisarparput umiarsuarmut ikillutik misissuisarnissaat. Matumani aamma taamaaliorsimavugut.

Apeqqut: Sooq umiarsuit nammineq missuiffigisanngilisigit?

Nakkutilliisarnerup sukateriffigineqarnissaa eqqarsaatigineartoq

- Royal Greenlandimi qimmiuteqanngilagut hashimik assigisaannillu naamasaqarsinnaasunik, isumalluuteqarpugulli tamakkuninnga nassaarsinnaasunik.

- Oqartussat misissuinissamut ilinniarsimasuupput, uagullu misissuinissamut ilinniarsimasuunata. Taamaammat oqartussat qanimut suleqatigisarpavut, anngiortumimmi eqqussisoqartarnissaa soqutigisarinnginnatsigu.

- Suliap matuma pineqartup paasisaqarfineqarnissaanut sapinngisatsinnik ikiuutissaagut, Lars Nielsen oqarpoq.

Taassuma ilanngullugu oqaluttuaraa, ingerlatseqatigiiffimmit umiarsuarnik nakkutilliisarnerup sukateriffigineqarnissaa eqqarsaatigineqartoq. Amutsivimmiinnermulli atatillugu suliassaq ajornaatsuinnaannginnerarlugu:

Tigusarinnittoqarsimanngitsoq

- Ullut tamaasa inuppassuit umiarsuarmiittarput pallillu atortunik imallit umiarsuarmut ikiorarneqartarlutik. Taamaammat umiarsuup aallanngilaataani nakkutilliisarneq pitsaanerpaavoq, Lars Nielsen oqarpoq.

Avataq Frederikshavnimiit ataasinngornermi unnulluinnartoq aallarsimavoq.

Nordjyllandimi Politiit Sermitsiaq.AG-mut marlunngornermi ullup-qeqqata siornatigut ilisimatitsissutigaat, suliamut atatillugu suli tigusarinnittoqarsimanngitsoq, pisorli misissuiffgineqartoq:

- Teknikkikkut suli misissugassarlunilu killisiuisoqartussaavoq, vicepolitiinspektøri Kenneth Ginnerup oqarpoq.