Aalisarneq
Royal Greenland: Atugassatut sinaakkutit aalaakkaasut aalajangiisuulluinnarput
Aalisakkanik tunisassiorfik Namminersorlutik Oqartussanit pigineqartoq Royal Greenland piujuartitsinermik tunngavilimmik aalisarnernik aalaakkaasunik atugassatut sinaakkutinik kissaateqarpoq. Ukiuni arlalinni pitsaasumik ingerlatsinermi angusaqarnermi aamma aalaakkaasumik ingerlatsinermi atukkat tunisassiornermi atortunut nutaanut aningaasaliinissamut periarfissaqartitsivoq, taamaalillunilu nutaanik suliffissaqarlerluni.
Royal Greenland aalisarnermik inuussutissarsiuteqartut allat assigalugit aalaakkaasunik atugassaqarnissamik, pisassiissutinik piujuartitsinermik tunngaveqartunik kissaateqarpoq.
Raajat maligassiuisuupput
Aqutsinerup, biologit siunnersuisut aamma raajarniat akornanni pitsaasumik suleqatigiinneq, aalaakkaasumik atukkanik qanoq pilersitsisoqarsinnaaneranut assersuutissatsialaavoq.
- Niuernitsinni aningaasatigut pitsaasumik angusaqarnissarput tunisassiorfinnut nutaanut suliffinnik pilersitsisunut, aningaasaliisinnaanitsinnut tunngaviusoq qulakkiissagutsigu, unammilligassagut ataatsimut isigalugit suunerinik paasisaqaqarsimanissaq pingaaruteqarpoq, Royal Greenlandimi attaveqarnermut pisortaq, Jens K. Lyberth, Sermitsiaq.AG-mut nassuiaavoq.
Royal Greenlandip unammilligassai aamma aningaasaliinerit nutaat paasiniarlugit piffissaq ukiut tuusintilikkuutaat nikiffiannut utertittariaqarparput.
Raajanik tunisassiorfik allanngortinneqartoq
Royal Greenlandip taamani Qasigiannguani raajanik tunisassiorfik iluatsittumik aalisakkerinngortippaa, tassani qalerallit Europami aamma Asiami niuerfinnut tunisisassiarineqarsinnaallutik.
- Kinamiut qulit aamma nammineq sulisugut peqatigalugit tunisassianik ineriartortitsivugut, tassani qalerallip ilaa Asiami aamma ingammik sushinik niuernermut tunisassiaraagut, Jens K. Lyberth ilisimatitsivoq.
Ukiut ingerlapput, qalerallit pisarineqartut amerlipput, Asiamullu niuerneq pitsaasoq pilersinneqarpoq.
Ukiut marluk matuma siorna pissutsit allanngorput. Tamanna qaleralinnik tulaassuinerup appariarneranik pissuteqarpoq, qalerallit angissusimikkut millipput, taakkulu Europami aamma Asiami niuerfinnut tunisassiatut ineriartortitarisimasanut tulluanngillat. Tamatuma saniatigut tulaassuisutta ilaat qaleralinnik namminneq tunisassiorfimminni suliarinnissinnaalersimapput.
Royal Greenland avannamukartariaqartoq
Taamatut ineriartortoqarnerani Royal Greenland avannamut isigisariaqalersimavoq, Upernavimmi Uummannallu eqqaani tunisassiorfitik allanngortittariaqarlugit, taamaalillutik tunisassiarinissaannut piumasaqaatinut Qasigiannguani tunisassiorfimmi ineriartortinneqarsimasumut tulluartunngortinneqarlutik.
Pisat amerlassusaat aamma pitsaassusaat kiisalu tunisassiorfiit unammillernartoqarpoq. Aalisarsinnaanermut akuersissutit amerlineqarnerat aalisarnermik suliaqartunut tamanut eqquisoq aamma unammillernartuuvoq.
- Sulisut aalisarsinnaanermut akuersissutinik pissarsisut, taamaalillutillu tulaassuisunngortut misigisarparput, tamatumalu tunisassiorfinni aalaakkaasumik tunisassiornissap qulakkeernissaanut unammilligassaqartippaatigut, Jens K. Lyberth nassuiaavoq.
Tunisassiorneq aalaakkaasoq pingaaruteqarpoq
- Tunisassiornerup aalaakkaasuunissaa uagutsinnut aalajangiisuulluinnarpoq, taamaalilluta niuerfinni assigiinngitsuni tunisinissamut isumaqatigiissutit naammassisinnaaniassagatsigit. Atugassat sinaakkutaat allanngortillugit illoqarfinnit allanit imaluunniit nunaqarfinnit nunanit allaniilluunniit tunisassiorfinni sulisussanik tikisitsisariaqartarpugut, Royal Greenlandimi pisortaq naqissusiivoq.
Tamakkiisumik paasinninneq
Sumiiffiit ilaanni aalajangiinerit sumiiffinnut allanut iluatsinngitsumik sunniuteqarsinnaanerannut, pitsaanerusumik tamakkiisumik paasinninnermik pilersitsisoqarnissaat taassuma neriuutigaa.
- Nalillit tamakkiisut isiginiartariaqarpagut: pisaqarnermit tunisassiornermut, naggataatigullu naleqquttumik akilimmik pitsaasumik tunisaqarnissamut, pisortaq nassuiaavoq.