Royal Greenland Asiami ingerlalluarpoq

Asiami tuniniaavik Royal Greenlandimut pingaaruteqaleraluttuinnarpoq.

Tamanna erserpoq selskabip namminersorlutik oqartussanit pigineqartup pingasunngormat Nuummi ataatsimeersuarnerani, tassani suliffeqarfissuup pisortaata Mikael Thinghuusip 2014/2015-imut naatsorsuutit saqqummiummagit.

Japanimi Kinamilu tuniniaaviit malunnartumik siuariarfiupput.

1,1 milliard koruunit sinnerlugit

Taamaasilluni Asiami tunisat siullermeersumik Royal Greenlandip kaaviiaartitaanit 1,1 milliard koruunit sinneqarsimapput. Ukiumi naatsorsuusiorfiusumi 2010/2011-mi tamaani tunisat kaaviiaartitat tamarmiusut 15 procenterisimavaat, naatsorsuusiorfimmilu kingullermi tamaani tunisat 23 procentimut amerleriarsimapput.

– Tamanna angusatta naammagisimaarluinnakkatta ilagaat. Periusissatut pilersaarutitsinni, The North Atlantic Championimi, Asia samminiartorujussuusimavarput, Mikael Thinghuus ataatsimeersuarnermi erseqqissaavoq.

100 procentit sinnerlugit

Asimi tunisat ukiut tallimat ingerlaneranni 100 procentit sinnerlugit amerleriarsimapput. Ukiuni arlalinni tunisassianik ukiumut 250 millioner koruuninut tunisaqartarsimalluni, ingerlatsivik ukiumi naatsorsuusiorfiusumi kingullermi 500 millioner koruunit sinnerlugit nalilinnik tunisaqarsimavoq.

Ilanngullugulu imarmeersunik tunisassiorfissuaq ukiuni arlalinni Japanimi tuniniaavimmi akunnaallillugu ukiumut 500 millioner koruuninik nalilinnik tunisaqartarsimavoq.

– Tamanna kakkaginaqaaq. Tassami ukiuni kingullerni japanimiut aningaasaat yen 25 procentit missarpiaannik nalikilleriarsimavoq. Taamaakkaluartoq akit qaffassinnaasimapput tunisallu amerlisimallutik. Japanimi selskabitsinni maanna 30-nik sulisoqarpugut, tuniniaasuvullu sulilluarsimasorujussuupput, Mikael Thinghuus erseqqissaavoq.

Pingaarnerusumik tuniniaavik

Asiami tuniniaavimmi siuariartortoqartaluartoq Europa suli tuniniaavittut pingaarnersaavoq, tassani Royal Greenlandip siorna kaaviiaartitaasa 76 procentii kaaviiaartinneqarsimallutik - pingaarnerusutullu tunisassiani raajat, qalerallit saarulliillu tuniniarnerat samminerulersimallugu.

– Raajat qalipaajarlugit uutat pingaartumik Tuluit Nunaanni Skandinaviamilu tunisaalluarsimaqaat, Mikael Thinghuus oqarpoq.