Royal Greenland akuersaarpoq - aningaaserivik itigartitsisoq

Avannaani qaleralinniarnerup nungusaataanngitsumik ingerlanneqannginnera pissutigalugu Grønlandsbankip avannaani aalisartunut umiatsiarserusuttunut aningaasanik atukkiiumanngilaq, pisortaq oqarpoq. Akerlianik Royal Greenland, Halibut Greenland aamma Polar Seafood aalisartunut aningaasaliiumapput.

Biologit siunnersuutaat sipporlugit Naalakkersuisut ukiuni kingullerni sinerissap qanittuani, ingammik qaleralinniarnermi, pisassiissuteqartarput. Avannaani sinerissap qanittuani qaleralinniarneq nungusaataanngitsumik aqunneqanngitsoq Pinngortitaleriffik aamma WWF Verdensnaturfonden isumaqarput. Tamanna Grønlandsbankenimut ilaatigut sunniuteqarpoq.

Sermitsiaq taama allaaserisaqarpoq.

- Qaleralinniarnerup nungusaataanngitsumik ingerlanneqannginnera pissutigalugu sinerissap qanittuani aalisartunut aningaasaliinissaq ajornartorujussuuvoq, pisinnaanngingajaavittutut aamma oqaatigineqarsinnaavoq, pisortaaneq Martin Kviesgaard oqarpoq.

Avannaani sinerissap qanittuani qaleralinniartartut 1.800-t aamma 2.000-it missaannipput. Politikkerit aamma susassaqartut immikkoortortaqarfinni Diskobugtimi, Uummannami aamma Upernavimmi ingerlatsinerat Grønlandsbankenip aalisartuaqqanut aningaasanik atukkiisinnaanerat ajornakusoortippaa. Umiatsiaaqqanik aamma aalisarnermut atortunik aningaasanik atukkiisinnaaneq ingerlatsinerlunnerup pissutigisaanik atukkiisoqarsinnaanngilaq.

Avannaani qaleralinniarneq pillugu Grønlandsbanken siullerpaamik avammut nalunaaruteqarpoq, ingerlatsinerluttoqarnera pissutigalugu aalisartunut aningaasanik atukkiinissamut killiliilluni.

- Sooruna Grønlandsbanken taamatut oqariartuuteqarpa, Martin Kviesgaard?

- Politikkikkut aqqutissiuussinerit ataqqisarpavut, taamaattoq aalisagaqassusaa naapertorlugu aalisartoqarpallaarpoq. Aalisartut qaleralinniarnissamut pisinnaatitaaffilerneqartuarput. Siunissami qanoq amerlatigisunik pisaqarsinnaallutik aalisartut ilaasa ilisimanngilaat. Biologit innersuussaat qaangerlugit sumiiffiit ilaanni pisassiisoqartarpoq. Aalisartut amerliartortut pisassiissutit pisarineqartulluunniit ikiliartorput, tamanna aalisartunut eqquissaaq. Aalisartut isertitaannut tamanna eqquisinnaavoq, bankimi pisortaq oqarpoq.

- Aalisartut umiatsiaararsinissaannut aalisarnermulluunniit atortunik pisinissaanut tassa aningaasaleerusunngilasi?

- Aap, maannakkummi qaleralinniarnermut tunngatillugu ingerlatsineq aningaasaqarnikkut peqassutsimullu pitsaasumik ingerlatsisoqanngilaq. Tamanna pivoq naak maanna aningaasarsiortoqarluaraluartoq piffissaq qaninnerusoq eqqarsaatigalugu, oqarpoq.

Allaaserisaq tamaat Sermitsiami atuaruk – uani ataani aviisimut isissutissarsigit:

Powered by Labrador CMS