Royal Arctic Line: Sulisut iluarisimaarinninnerat 2017-imi appasinnerusoq

Umiarsuaatileqatigiiffimmi Namminersorlutik Oqartussanit pigineqartup sulisuisa iluarisimaarinninnerat 2017-imi unammillernartoqarpoq. Sulisut iluarisimaarinninnerat ukiup siulianut sanilliullugu pointinik pingasunik kinguariarsimavoq.

Umiarsuaatileqatigiiffik Namminersorlutik Oqartussanit pigineqartoq, Royal Arctic Line, 2016-imut sanilliullugu 2017-imi minnerusumik sulisut iluarisimaarinninneranik appariartoqarneranik misigisaqarpoq.

Umiarsuaatileqatigiiffik tusagassiuutinut nalunaarummi taama nalunaaruteqarpoq.

Umiarsuaatileqatigiiffiup nalunaarutaa naapertorlugu, sulisut Kalaallit Nunaanni naammagisimaarinninneq annertunerulluni, umiarsuarni Aalborgimilu appasinneruvoq. 2017-imi 71-imiit 68-imut appariaateqarsimavoq.

- Pilersissavarput assartuineq patajaannerusoq, akulikisuanerusoq imminullu akilersinnaanerusoq. Angallavigut ammanerullutillu eqaannerussapput, august 2019-imiillu nunatta nunarsuarmi ersittunngortinnissaa pilersikkumavarput. Allat assartuinermik ingerlatsisut suleqatigalugit Atlantikup imartaatigut uummaarinnerusumik assartuinerit ingerlatilissavagut – aammalu umiarsualiviit pitsaanerpaat aqqusaartugarilerlugit, umiarsuaatileqatigiiffik allappoq.

Anguniagaq anguniarlugu allanngortitsineq

Tamannalu anguniarlugu Royal Arctic Line suut tamangajaasa allanngortiteriffigisimavaat.

- Siunnerfigisagut, niueriaatsigut, sulisulerinerput, suleriutsigut aqutsissutigullu. Maannamut ulapinnikooqaagut. Umiarsuaatigut nutaanngiliartorput aqutsissutillu nutanngilisut navialisitsisinnaasimallutik. Sulisorpassuit sullissarpassuillu allannguutit annertuut malugisimavaat aammalu taarsiullugit eqqussuunneqartut, matoqqasumik ingerlatsinitsinniit eqaannerusumut ikaarsaarniarnitsinni pisartut.

Sulisut suliffeqarfimmik naammagisimaarinninnerisa appariarnera, umiarsuaatileqatigiiffiup nalunaarutaa naapertorlugu, minnerunngitsumik avataanit qanoq isigineqarnermik nammineq nalilersuinerannut atatillugu, aammalu sulisut ilaasa akornanni toqqissimajunnaariartorsimanerit pissutaapput.

- Maannamut allanngortiterinitsinni angusatsigut kingunerisaasumik, unamminartussatut aggersut akiorsinnaajartuinnarpagut. Tamannalu ilutigalugu sulerusussuseq aamma annertusiartussaaq, Royal Arctic Linemi isumalluarluni taama oqariartuuteqartoqarpoq.

Powered by Labrador CMS