Royal Arctic Line
Royal Arctic Linep ajutoorneq pillugu: ''Ajutoorneq ajussusia''
Kalaalimerngit qerisut 2 tonsit sinneqartut Aalborgimi umiarsualivimmi maangaannartinneqarput. Juunip 21-anni inuiattut ullorsiortoqangajalernerani ingammik uggornarpoq, kalaalerpassuit Danmarkimiittut kalaaliminertornissamut qilanaarsimagaluarmata.
- Ajutoorneq ajuusaarnarluinnarpoq, Royal Arctic Linemi maalaaruteqartarfiup immikkoortoqarfiani pisortaq, Henning Jollmann, Sermitsiaq.AG-mut nassuerpoq.
Ajutoorneq immikkut uggornartoq
Ukiut ingerlanerini taanna maalaarutinik aamma taarsigassarsiassanut sulianik tigusarpassuaqarnikuuvoq, imaatigut nassiussat ajoqusersinnaasarnerat pinngitsoorneqarsinnaanngimmat.
- Kisianni sapaatip-akunnerata siuliani Aalborgimi ajutoorneq tusarakku ajorluinnartoq paasivara. Aningaasartaasa amerlassusaat apeqqutaavallaanngilaq, kisianni kalaalimerngit annaaneqarnerisa nalingi uggoraagut, Henning Jollmann oqarpoq, qerititsivik containeri Aalborgimi umiarsualivimmi nuunneqarnerani inuup kukkussutaanik innaallagissamut atassutilerneqanngitsoorsimasoq ilisimatitsissutigaa.
Tassani qerisut 2,2 tonsit pineqarput, taakku palitsinut marlunnut avinneqarsimapput, inuussutissarsiortut nioqqutissaataat qerisut 1 tonsinik oqimaassusillit. Sinneri nerisassat 40-nit 50-it tungaanut amerlassusillit inuit Danmarkimi ikinngutiminnut nalunngisaminnullu nassiussimasaat.
Inuup kukkussutaa
- Ajutoorneq it-mik unammilligassanut tunngassuteqannginnera naqissusertariaqarpara. Containerip nuunneqarnerata kingorna innaallagissamut ikkunneqannginnera inuup kukkussutigaa, maalaaruteqartarfimmi pisortaq oqarpoq, taassuma maanna atuisut amelrlasuut umiarsuaateqarfik inuiattut ullorsiortoqarnerani nerinerup nalaani ajortumik oqaluuseriumaaraat ilimagaa.
Aamma atuaruk: It-systemi nutaaq nassiussanut kinguaattoortitsisoq
Atuisunut taarsigassat siulliit tunniunneqareersimasut taanna paasissutissiivoq. Kisianni tassunga atatillugu Danmarkimut nassiussinermi sillimmasiisarnissaq eqqaamaqqullugu Henning Jollmannip maluginiaqquaa.
Nassiussat sillimmasernissaat eqqaamallugu
- Umiarsuaateqarfittut uagut ajutoornernut taamaattunut sillimmateqarpugut. Atuisunut taarsigassatta amerlassusaat imarsiornermut inatsit naapertorpaat, taakku qerisut pineqartut kiilumut 18-ninik taarserneqassapput, Henning Jollmann ilisimatitsivoq, qerisut kiilumut akii qaffasinnerussasut taassuma ilisimalluarpaa.
- Nassiussat sillimmaserneqartariaqarnerinut paasissutissiisarneq ilungersuutigaarput. Amerlasuullu tamanna qujanartumik toqqartarpaat, taanna ilisimatitsivoq.