Containerilerineq
Royal Arctic Line pitsannguallappoq
Royal Arctic Linemi kukkusumik containerik assartuisimanerit sapaatip-akunnerisa aappassaani ikilisinneqarsimasut pitsaassutsimik uuttortaanermi kingullermi erserpoq, taamaasilluni kukkunerit 0,5 procentiinnanngorput.
Royal Arctic Linep it-systemimik atuutilersitsiniarnermi containerinik assartuinini kukkuluttorfigingaatsiarsimavaa, tamannalu inuussutissarsiornermik ingerlataqartunut annertuumik sunniuteqarsimavoq.
Sapaatip-akunnera 26-miit 28-mut, kukkunerit arlaatigulluunniit ajutoornerit pissutaallutik containerit 61-t missaat usiliunneqarsimanngikkunik apuuffissarinngisaannut niuneqartarsimapput.
Massakkulli ilorraap tungaanut ingerlasoqalerunarpoq, sapaatip-akunnerimi aappassaanik pitsaassutsimik uuttortaanerup takutippaa, container kukkusumik suliarineqarsimasut tallimanik ikileriaateqaqqissimasut.
Umiarsuit tikiffissaminnut tikinnginnerini tikereernerisalu kingorna paasissutissat suli annertuumik ukkatarineqarput suleriaatsillu nutaat sunniuteqarpasipput, Royal Arctic Line paasissutissiivoq.