RAL
Royal Arctic Line ajugaasoq
Naalakkersuisut siulersuisunut seminarertitsineranni isumassarsialatsialannik unammisitsisoqarmat, Royal Arctic Line sulisoqarnermut ingerlatsissut datakkut ingerlanneqartoq pillugu saqqummiussartik ajugaassutigaat.
Unammisitsinermi Namminersornerullutik Oqartussat suliffeqarfiutaat Royal Arctic Line saqqummiussartik Datadrevet HR ajugaassutigaat.
Umiarsuaateqarfik Facebookimini paasissutissiivoq.
Naalakkersuisut sapaatip akunnera 11-mi siulersuisunut seminarertitsineranni isumassarsialatsialannik unammisitsisoqarmat, Royal Arctic Line sulisoqarnermut ingerlatsissut datakkut ingerlanneqartoq pillugu saqqummiussartik ajugaassutigaat.
Royal Arctic Linemi sulisoqarnermut immikkoortortaqarfiup siunertarivaa piginnaasallit maluginiarneqarnissaat, takutinneqartut nalilersorneqartarnissaat suliffeqarfiullu soqutiginarsarneqarnissaa. Taamaasillutalu oqarsinnaanngorpugut inuit piginnaassaat pingaarnerutikkigut piumasaqaatit eqqarsaatigivallaanngikkaluarlugit, taamaasiornikkullu nunaqavissut ineriartortinneqarsinnaanissaat periarfissiissutigineqarsinnaanngussalluni, RAL Facebookiminut allappoq.
Siulersuisunut seminarertitsinermi suliffeqarfiit arfinillit peqataapput, finalimilu KNI Royal Arctic Linelu unammisinneqarlutik.