Royal Arctic Line aatsaat taama sinneqartoortigisoq

Akileraaruteqannginnermi sinneqartoorut 143 millionit koruunit missaanniittoq, aamma akileraareernermi 98 millionit koruunit.

Royal Arctic Linep ukiumut 2016-imut naatsorsuutini angusaat kusanartut taamaapput, umiarsuaateqarfiup oqaluttuarisaanerani aatsaat taama annertutigisumik sinneqartoortoqarpoq.

- 2016-imi assartugassat annertusisimapput taakkualu aningaasaqarnermut ilusiliinerpaapput. Kisiannili aamma sinneqartooruteqarnermut peqqutaaqataapput aningaasartuutaasartut annikillisarneqarnera aammalu ingerlatseriaatsimi pitsanngorsaasoqarsimanera, RAL tusagassiuutinut nalunaarummi allappoq.

Atuaruk: Aalborgip Kalaallit Nunaannut assartuineq suli suliniutigaa

Maanna Remontowa, Poleniminngaanniit umiarsuit sanatinneqarsimasut tamarmik umiarsualiviorfimmiit tunniunneqarnikuupput. Nunaqarfiliartaatsit marluk 2016-imi tunniunneqarput ullumikkullu ingerlaarfinni atorneqalereerlutik. Umiarsuaq kingulleq, Malik Arctica, Mary Arcticap assipajaava, februaari 2017-imi tunniunneqarpoq, taannalu ingerlaarfimmut ilanngunneqassalluni 2017-imi maajip qeqqata missaani.

Royal Arctic Lineminngaanniit naatsorsuutigineqarpoq 2017-imi suliassat 2016-imut assingussasut imaluunniit Kalaallit Nunaannut assartorneqartartut, sanaartornerup annikillisimanerata peqqutigisaanik, annikinnerussasut.

- Royal Arctic Lineminngaanniit suli aningaasartuutit aqunneqarnerunissaat ukkatarineqarneruniarpoq tassungalu peqqutaavoq 2017-imi umiarsuarnut umiarsualivimmullu nutaamut aningaasartuutissat annertunerusussaanerat, taakkualu aningaasaqarnermut kalluaasussaallutik.

- 2017-imullu naatsorsuutigineqarpoq Royal Arctic Line A/S-ip sinneqartoorutai akileraarutinut akiliisoqannginnerani 20-30 million koruunit missaanniikkumaartut, tusagassiuutinut nalunaarummi oqaatigineqarpoq.

Atuaruk: Royal Arctic Linemi soraarsitsiortornissanik aarlerisaarisoq