Rotaryp uummammik aallarsaatit sumiissusersinissaanut app Røde Korsimut tunissutigigaa
Rotaryklubbit sisamat, Nunatsinneersut Danmarkimeersullu mobilimut app'imik pilersitsinissamut suleqatigiipput, nunatsinni illoqarfinni uummammik aallarsaatit sumiissusersinissaanut atortussamik.
Innuttaasut uummammik aallartitsissutinik pisariaqartitsigunik mobilimi app atorlugu sumiissusersipallassinnaalissavaat.
Nuuk Rotary Klub, Rotary E-Club One of Denmark, Hørsholm RK aamma Humlebæk-Nivå RK ataatsimoorlutik nunatsinni illoqarfiup iluani uummammik aallartitsissutit sumiissusersinissaannut atortorissaarummik pilersitseqatigiipput. Suliniut 160.000 koruuninik akeqarpoq, Kalaallit Røde Korsiatalu suliap allaffissornertaa ingerlatissavaa.
Pisariaqartitsinermi uummammik aallartitsissutit taamaasillutik naniuminarnerulissapput. Rotary Klub tusagassiorfinnut taama nalunaaruteqarpoq.
- Uummammik unittoortoqassagaluarpat oqarasuaat angallattakkakkut kalerrisaarut app-i atorlugu siunissami sukkanerusumik uummammik aallarsaat qaninnerpaaq sumiinneranik nassaarineqarsinnaanngussaaq sumiiffinni tamanut ammasuni, tunniussinermi uppernarsaammi allassimavoq.
Rotaryp suliniut Kalaallit Røde Korsiannut tunniussimalerpaa. App-ilu uummammik allarsaatip ulluani, 16. oktober 2022 atulersinneqassalluni.
Anguniagaq anguneqartoq
- Nunatsinni sumiiffinni assigiinngitsuni uummammik aallarsaammik peqarnissaq pingaaruteqarluinnarpoq, aammalu taakku sumiinnersut innuttaasunit ilisimaneqarnissaat pingaaruteqarluni, Røde Korsimit Johan Barlaj oqarpoq.
Nunatsinni uummammik aallarsaatit 200-t tungaannoortut sumiissusersinissaat, sumiissusaallu app-imut nalunaarsornissaannut suliaq maanna aallartinneqassaaq.
Danmarkimi taama assingusumik ingerlatsisoqarpoq. TrygFondenip suliniut Danmarkimiittoq ingerlataraa.