Rosingip aningaasaasivik matutikkusuppaa
Suleqatigiissitsisuni illuatungeriit partiip aningaasaatai pillugit saqitsaassutigisaat ullumi ataatsimut Nunatta Eqqartuussiviani suliarineqassaaq.
Michael Rosingip, Suleqatigiissitsisuni suli siulitaasuunerartup aningaasanik atuinissamut inerteqquteqarnissaq piumasaraa, tassa siulittaasuugallartup Tillie Martinussenip siulersuisuunerillu partiip aningaasatigut amigartooruteqarnerat matussuserniarlugu aningaaserivimmi taarsigassarsinnginnissaat anguniarlugu.
- Tillie aningaasanik atuinissamut inatsisitigut tunngavissaqanngilaq, annilaanngatigaaralu partii akiitsoqartilersimassagaa, taanna Sermitsiaq.AG-mu oqarpoq.
Michael Rosingip nassuiaatigaa pisimasoq suliassanngortissimallugu, tassani partii akilersinnaanngisaminik akiligassaqalersinnaanera pinngitsoortinniarlugu.
Ulloq pineqartoq pillugu Tillie Martinussen siulersuisuunerillu sinneri oqaaseqartinniarlugit pissarsiassaasimanngillat.
Siulersuunerit siusinnerusukkut Sermitsiaq.AG-mut oqaatiginikuuaat karsi imaarneqarsimanngitsoq, soorlu aningaaserisuusimasup Jan Joe Seidsenip Michael Rosingillu oqaatigisimasaattut.
Partiimut tapiissutit Tillie pissutaalluni tunniunneqartartut
Michael Rosingip erseqqissaatigaa, partii Inatsisartuni ataasiinnarnik ilaasortaatitaqartoq, partiimutllu tapiissutit januaarimi tunniunneqartussat ilaasortamut tassunga ataatsimut attuumassuteqartut.
Tillie Martinussen arlaannik pissuteqarluni partiimit tunuassappat imalluunniit ilaasortaajunnaartinneqassappat, taava partiimut tapiissutit Suleqatigiissitsisunut tunniunneqartarunnaassapput, tassa Tillie Inatsisartuni attaviitsutut ingerlaannarusussappat.
Tilliep tunuarnera pissutigalugu Suleqatigiissitsisut Inatsisartuni sinniisussamik ilanngussissappata, sinniisutut inissaq Michael Rosingimut siullertut sinniisussaasumut tunniunneqassaaq.
Michael Rosingip siusinnerusukkut oqaatigereernikuungaluarlugu nuna tamakkerlugu politikkimit tunuarnikuulluni, Inatsisartuni ilaaleqqissinnaanini tunuartinngilla.
- Qularnanngitsumik ilaasortanngoqqissaanga. Taamaaliussangumalu kommunalbestyrelsimi ilaasortaaninnit tunuartariaqassaanga, taanna oqarpoq.
Suliaq sivisusinnaasoq
Inerteqquteqartitserusunneq eqqartuussivimmi nukiginnartutut suliarineqassatillugu, piaakannersumik aalajangiisoqartarpoq. Amerlasuutigut ullut marlussuit ingerlaneranni.
Tamatuma kingorna aalajangersaanissaq suliarineqartarpoq, tassani suliaq itisilernerullugu suliarineqarlunilu inerteqquteqartoqassanersoq aalajangiiffigineqassaaq. Suliat taamatut ittut ukioq ataaseq taannaluunniit sinnerlugu suliarineqarsinnaasarput.
Eqqartuussiviulli aallaqqaammut aalajangiiffigissavaa, Tillie Martinussen siulersisuunerillu partii sinnerlugu taarsigassarsisinnaanerannut inerteqquteqartoqassanersoq.