Rosing: Arferit Nuup Kangerluaniittut eqqissisimatinneqarlik
Mikael Rosingip Suleqatigiissitsisuneersup qipoqqaat Nuup Kangerluaniittut eqqissisimatikkusuppai
Kommuneqarfik Sermersuumi kommunalbestyrelsip aqangu marlunngornermi ataatsimileruni eqqissisimatitsinissamik siunnersuut, suliffeqaffissuarmit tapersersorneqartoq suliarissavaa.
Mikael Rosing isumaqarpoq, qipoqqarniarnermut sanilliullugu arfernik takuniaalluni angalasarneq aningaasanik isaatitsiffiunerussasoq.
Kukkusumik ingerlatsineq
- Isumaqarpunga, Nuup Kangerluani qipoqqarnik piniartitsisarnitsigut isumalluutivut uumassusillit kukkusumik ingerlakkivut, Mikael Rosing oqarpoq, nangillunilu:
- Innuttaasut aliannaarsaariarlutik arfernik soqutiginninnerat ilaatigut kangerlummi qipoqqarnik piniarnermik sakkortuumik akerliunermik aallaaveqartarpoq, aammalu maannakkut Facebookgruppen Whalespotters Nuuk 2.000-inik ilaasortaqartoq aqqutigalugu.
2010-mi qipoqqarniarneq aallarteqqinneqarpoq ukiut 24-t piniagaanngereerlutik. Piffissami pineqartumi qipoqqaat sisamat pisarineqarsinnaasimapput.
Qipoqqaat ikileriarsimasut
- Piniagaanerisa kingunerisaannik Nuup Kangerluani arferit ikileriarsimapput. Pinngortitaleriffik naapertorlugu kangerlummi arfernit nikinneq ajortunit arfiniliusunit pingasut 2014-imi pisarineqareersimasut. Arferit arfinillit Pinngortitaleriffimmut arferit assilineqarsimasut nassiunneqartut 50%-erivaat. Imaappoq Nuummiit qipoqqarnik isiginnaarnissamut aammalu Nuup Kangerluanut angallammik angalaarnissamut periarfissakinnerulersoqassaaq, tamannalu Nuummi innuttaasut aliannaarsaarnissamut naleqartitaannik ikilisaanerulluni, qaqutiguinnaq takorannersunik isiginnaartalissammata, aammalumi illoqarfimmi takornarialerisunut akornutaassalluni, amerliartuinnarmatami takornariaqarnermi qipoqqarnik takuniaasitsinissamut amigaateqartut, Suleqatigiissitsisuni kommunalbestyrelsimut ilaasortaq inassuteqaammini allappoq, allataa imatut nipeqarpoq:
-Nuup Kangerluani qipoqqarniarneq tamarmi kommunimilu arfernik nikinneq ajortunik piniarneq tamarmi inerteqqutaalissaaq.
Kommunimi ileqqoreqqusaq naammattoq
Suliffeqarfissuup ilisimatitsissutigaa, Kommunalbestyrelse Illoqarfiit Pingaarnersaat pillugu Periusissiami takornariaqarnermut inuussutissarsiornermullu tunngasunik annertuunik anguniagaqartoq eqqissisimatitsinissamut siunnersuummi taperserneqartoq.
Ilanngullugu ilisimatitsissutigineqarpoq, kommunip ileqqoreqqusani aqqutigalugu qipoqqaat siunissami piniarneqarsinnaanerat akornusersinnaagaa.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...