Rosap ataatami soraluaa Qaqortumi naapippaa
Rosa Kildahlip aatsaat 59-nik ukioqalereerluni, angunni kalaaliusoq aatsaat paasivaa. Maanna ilaquttani ujarsimalerpai
Rosa Kildahl 'Den store bagedyst' peqataanermini inuppassuarnit nuannarineqalerpoq, amerlasuunillu – minnerunngitsumik nunatsinni – suminngaanneernera isumaliutersuutigineqarpoq. Isikkuatigut takujuminaraluartoq, aatsaat ukiut marluk matuma siorna nassuiaatissartaa paasivaa.
Rosa Kildahlip angutaa kalaaliuvoq, Tittus Karlsenimik ateqarpoq Qaqortumeersuullunilu.
Arnaata 1950-ikkut qiteqqunneranni pualluummik tuberkulosemik napparsimanermini Skørping Sanatoriumimi naapippaa.
Marlunnut anaanaasoq inuusuttoq angullu kalaaleq qaninniarujoorsimapput, qaammatillu qulingiluat qaangiuttut Rosa Kildahl silarsuarmut appakaappoq.
Aallakaatitassiami ‘Rosas grønlandske hemmelighed’-imi TV2-mi ilaquttani ujartorpai. Rosap angajoqqaavisa inuunera tamaat piviusoq nipangiusimavaat, angutaatalu nammineq meeqqamisut pisimavaa.
Aanani aterigaa
Kisianni Rosa pania kimigiiserpoq, 2016-imilu angajoqqaani angunni pillugu oqaluttuartippai.
Nuummi allagaateqarfik aqqutigalugu angunni paasivaa, Tittus Jens Adam Karlsen, juunip 11-anni 1920-mi Qaqortumi inuusoq. Taassuma angajoqqaavi piniartuupput, angutaa Paulus Abel Karlsenimik ateqarpoq. Arnaa Augusta Tora Rosa Karlseniuvoq.
- Uuh! Taava aanaga ateraara, Rosa TV2-mi aallakaatitassiami nillerpoq.
- Isumaqarpunga nuannersuusoq. Tulluusimaarpunga, nuannaarpunga aamma attorteqaanga.
Tittus Karslen 1989-imi toquvoq.
Kisianni Rosap Qaqortumi Karen Rosa Karlsen nassaaraa, taanna Tittus Karlsenip soraluaraa, tassanilu peroriartorsimalluni. Taassuma pisatai kingornussimavai, assit aamma allattaaviit. Illu najugaqarfia Tittus Karlsenip illorisimavaa.
Ilisivimmi assi
Tittus Karlsen toqussi tikillugu ilisivimmi niviarsiaqqamik assiuteqarsimasoq, Karen Rosa Karlsenip oqaluttuuppaa. Rosap marlunnik ukioqarluni taanna assinga.
Karen Rosa aamma allamik oqaluttuassaqarpoq: Tittus Karlsenip taanna kisiat qitornarinngilaa. Rosa angummini arfinilinnik arfineq-marlunnilluunniit qatannguteqarpoq.
Rosa Kildahlip Nunatsinnut angalasimanini nuannaarutigalugu aallakaatitassiami oqaluttuaraa.
- Ilaqutariinni isertugaatit qaqinneqartarnera pingaarutilerujussuuvoq. Tassami ilumoortoq inunnut isumaqarmat saqqummiunneqartariaqarpoq. Uanga toqqissisimallunga ima oqarsinnaalerpunga: Suminngaanneernera ilisimavara, tamannalu qanoq atassuteqarnersoq nalunngilara. Suna tamarmi maanna inissippoq, tamannalu qujamasuutigaara, taanna oqarpoq.
'Rosas grønlandske hemmelighed'-imi aallakaatitassiap aappaa unnugu nalunaaqutaq 20.00 TV2-mi takuneqarsinnaassaaq. Aallakaatitassiaq siulleq juullerujussuarmi aallakaatinneqarpoq.