Rosannguaq Rossen Visit Greenlandimi attaveqaqatigiinnermut pisortanngussaaq
Visit Greenland attaveqaqatigiinnermi pisortatut atorfimmik pilersitsisimavoq, 40-nillu ukiulik Rosanguaq Rossen Ilisimatusarfimmi atorfeqartoq tassani atorfinitsissimallugu.
Visit Greenland Nuummi sulisunik amerlisaavoq, Købenavnimilu allaffik aappaagu martsip qaammataani matuniarlugu. Tassunga atatillugu takornariartitsisarnermut siunnersuisoqatigiit pisortatut atorfimmik nutaamik pilersitsisimapput, Rosannguaq Rossenilu atorfinitsissimallugu.
Attaveqaqatigiinermi pisortanngortinneqartoq Ilisimatusarfimmi immikkoortortaqarfimmi pisortaavoq, tassani ukiut kingulliit arfineq-pingasut ilinniartitsinermik, ilisimatusarnermik ph.d.-liornerlu suliaralugit atorfeqarsimavoq
- Ilisimatusarninnut atatillugu kalaallinut inuiaqatigiinnut paasissutissanik ingerlatitseqqittarpunga, isumagalu malillugu anguniakkavut ingerlatitseqqittarnikkut paaseqatigiissitsinikkullu angusinnaavavut. Visit Greenlandip nunatsinni takornariaqarnerup pitsaasumik ingerlanissaanik takorluugaa aammalu pitsaassuseq, isumannaassuseq, nungusaataanngitsumillu atuinissamut sammisumik suleriuseqarneq, nunatsinni sumiiffiit aallaavigalugit takornariaqarnermik suliniuteqarnissara qilanaaraara, attaveqaqatigiinermut
pisortanngortussaq oqarpoq.
Sisimiuniit
Kalaallillu Nunaannut atatillugu nittarsaassisarnera nutaajunngilaq. Rosannguaq Rossen ilaatigut Jyllands Postenimi martsip qaamataani allaatigisasaqarsimavoq, tassani Danmarkimi tusagassiorfiit Kalaallit Nunaat pillugu oqaluttuartarnerat sammisimavaa, tassani Naalagaaffeqatigiinni nunat imminnut ilisimanerulernissaat anguniarlugu piumasarisimavaa nuna innuttaasullu pillugit assigiinngisitaarnerusumik takutitsisarnissaat.
Rosannguaq Rossen 40-nik ukioqartoq Københavnimi inunngorsimasvoq Sisimiunilu peroriartorsimalluni, 2005-miilli ilaquttanilu Nuummiilerput. Issittup ilisimatusaatigineranik ph.d-tut tunuliaqutaqarpoq, tassanilu ilaatigut nunagisat nittarsaannerinik ilisimatusaateqarlunilu ilinniartitsisuusarluni. Aamma Air Greenlandimi timmisartuni saqisutut Visit Greenlandimilu siunnersortitut sulinikuuvoq.