Rosa: Kalaallit Nunaannukarnissaq takorloortuaannarnikuuara

'Rosas grønlandske hemmelighed'-ip immikkoortup aappaat kingullerlu ippassaq TV2-mi takutinneqarnerata kingorna, Rosa Kildahl assigiinngitsutigut allagarsisaqattaarpoq.

Aallakaatitsinerup kingorna TV2-p nittartagaani chatterpoq, Facebookimi aamma Messengerimi allattoqaqattaarpoq. Allattullu arlallit Rosatut ittumik oqaluttuassartaqarput.

- Pitsaasorpassuarnik allagarsivunga. Pissutsit taamaattut attorneqarnerat nuannaarutigalugu arlallit oqarput, Rosa Kildahl Sermitsiaq.AG-mut oqaluttuarpoq.

- Maanna ammaanneqarnera aamma paquminartup saqqummiunneqarnera nuannaarutigaara. Sumiiffippassuarni taamatut nipangiussisoqartarsimagunarpoq, taanna oqarpoq, tamatumalu saniatigut allaanerusumik isikkoqarnini aamma suminngaanneernerminik nalornissuteqarsimanini ajornartorsiutaasimanngisaannartoq naqissusiivoq.

Allat ammartut

Rosap nammineerluni inuunermini inissitassanut apeqqummut tunngasimavoq.

- Arlallit maanna suminngaanneernertik pillugu apeqqut samminiarlugu oqaatigaat. Anaanaasup maanna panini qanoq pisoqarsimaneranik oqaluttuunniarlugu aamma allattoqarpoq.

Kalaallit Nunaannut tikinneq

Rosa Kildahlip aallakaatitassiamut immiussinermut angumminillu ujartuinermut atatillugu Kalaallit Nunaat aggustimi tikippaa.

- Kalaallit Nunaannukarluni nuannerluinnarpoq. Tamanna takorloortuarsimavara – immaqa aamma isikkuma nassuiaatissartaa tamaani nassaarissallugu ilimagisimagakku. Takorluukkannit alutornarnerujussuuvoq. Qanoq oqaluttuarissallugu nalunarpoq, maani misigisat annertuut aamma assit takutinngilaat, taanna oqarpoq.

Inussiarnersut aamma ammasut

Nuna kisimi Rosap maluginiarsimanngilaa – tikeraarnerminilu inuit naapitat maluginiarneqarput. Inuppassuit ‘Rosa Den store bagedystimeersoq’ ilisaralugu ilassiorpaat.

- Nuanneqaaq. Naapitakka tamarmik inussiarnisaarlutillu ammapput. Kikkut tamarmik ilassiorlunga Kalaallit Nunaanni sunersunga apersorpaannga. Kikkullu tamarmik qungujulaffigaannga.

Isikkumigullu angunni, Tittus Karlsen, kisiat qujassutissaqarfiginngilaa. Immaqa aamma pissusaa pisooqataavoq.

- Quianakujuppoq, tassami uanga pissusinnut eqqaanarami. Inussiarnisaarniartuaannarpunga aamma qungujulaniartuarlunga, ulluni aamma nuannaarpallaarfiginngisanniluunniit.

- Maani Danmarkimi Kalaallit Nunaat pillugu isummiussereertartut anmma ajornartorsiutinik kisimi isiginnittut amerlapput. Kisianni nuna tikikkaanni oqaluttuarineqartartut ilumuunngitsut paasineqartarpoq. Tassami ajornartorsiuteqartoqaraluartorluunniit, inuit naapitakka nuannaarpasillutillu inuunertik naammagisimaarpasippaat.

Kalaallit Nunaanni ilaqutarpassuit

Aallakaatitassiami Rosap ataatami soraluaa aamma affarmik qatanngutimi ilaat naapippai. Taanna suli Facebookikkut attaveqarfigaa, ingammik soraluaa Karen Rosa, kisianni maannamut ilaquttami sinneri Kalaallit Nunaanni ujarnissaannut pilersaaruteqanngilaq.

- Affarmik qatanngutit arfinillit arfineq-marluk, aappaat, meeraat aamma ernutaat ilanngutissagukkit amerlavallaassapput, taanna nassuiaavoq.

- Ilaqutaqareerpunga, Kalaallit Nunaannilu ilaqutarpassuarnut atassuteqarnissamut piffissaqarnavianngitsoq piviusorsiorlunga ilisimavara.

Qatanngutaa ungasinngitsoq

Suna tamarmilu aamma inisseqqaartariaqartoq, taanna nassuiaavoq. Kisianni Rosa eqqaasaqarpoq.

- Uanga najugaqarfinnit ungasinngitsumi najugalimmik qatannguteqarpunga. Taassuma ataataga nalunngilaa, taanna attaveqarfiginiarpara.

- Taassuma kisianni ilisimanngilaa, Rosa illapalaajutigaluni oqarpoq, taanna ilisarisimaneqaatigilersimavaa.

Kalaallit Nunaannut tikeqqilersoq

Himmerlandimi nuna Kalaallit Nunaat pinnagu angerlarsimaffigiuartussaavaa. Kisianni Kalaallit Nunaannut tikeqqinnissani qilanaaraa, tassa tikingajalerpoq. Nuummi Unnuk Kulturisiorfimmut atatillugu januaarip 19-anni Nunatta Atuagaateqarfiani saqqummiissaaq.

- Qilanaartorujussuuvunga, maannakkullu aamma uiga ilaatilerpara. Taassuma kisimi Kalaallit Nunaat tikinnikuunngilaa, taanna oqarpoq, paninilu Trine aggustimi angalaqatiginikuullugu unnersuutigaa, erneratalu aamma piffissami allami Kalaallit Nunaat tikereernikuusimavaa.

Allaanerusumik isikkoqarnini aamma suminngaanneernerminik nalornissuteqarnini ajornartorsiutaanikuunngitsoq, Rosa Kildahlip oqaatigaa. Kisianni tamatuma inissinnera iluarisimaarnerarpaa.