Rosa Thorsen Nuummut angerlartoq
Rosa Thorsen ukiup aappaa avillugu Siumut sinnerlugu Folketingimi ilaasortamut Aki-Mathilda Høegh-Damimut politikkikkut siunnersortitut sulereerluni, Nuummi Naalakkersuisunik sullissinissaminut piareersimavoq.
Rosa Thorsen 2021-mi apriilip qaammataanili Aki-Mathilda Høegh-Damimik Folketingimmi sullissereerluni Nuummukarpoq.
- Nuummut uterlunga Naalakkersuisunik sullissinissannut qilanaarpunga. Angerlarsimmafimmiilluni pitsaanerpaavoq, Rosa Thorsen allamik suliffeqalernini pillugu oqarpoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisumut Peter Olsenimut (IA) allatsitut atorfinissimavoq.
Nunagisamut asannittuusoq
For Rosa Thorsenip pisortarisimasani Siumumeersuusoq pisortassami nutaap IA-junera ajornartorsiutiginngilaa.
- Partiip sullinneqarnissaa pivallaarnagut Kalaallit Nunaata siunissaa pillugu sulissuunga. Nunagisannut immaqa asannilaarsimavunga. Nunanga sullitsillugu aningaasarsiat partiillu sumut attuumassuteqarnera pingaaruteqanngillat, taanna erseqqissaavoq.
Rosa Thorsen novembarip aallaqqaataani atorfimmini nutaami sulilissaaq, taamalu Københavni folketingilu kiisalu panini Danmarkimi najugaqartoq qimattussanngorlugit.
- Ukiuni marlunni kingullerni paninnut qanittumiissinnaasimallungalu Københavnimi kalaallimik politikkerimik sullissisinnasimanera assut nuannersimavoq.
Rosa Thorsen siusinnerusukkut Naalakkersuisut Siulittaasuata Naalakkersuisoqarfiani sulisimavo aamma Ane lone Baggerimut (S) Doris J. Jacobsenimullu (S) allatsitut sulisimalluni. 1994-imi Ilisimatusarfimmi tusagassiortutut ilinniakkaminik naammassinnippoq, aamma KNR-imi Sermitsiaq.AG-milu sulisimavoq.