Koncert
Rock quianartunik mamarsaaserlugu
’Labrador Kangian’ Suaasat’ torrutiinnarlugu siullermeerlutik aliikkusersuissapput ukiormanna tusarnaartitsinerit kingullersaat Katuami pilerpat
Ukiormanna Katuami tusarnaartitsinerit kingulersaanni Kimmernaq Kjeldsen appisimaalerpat scenemi pulaartut takkuttarnerisigut immikkut suliarineqassaaq. Ilaatigut
’Labrador Kangian’ Suaasat’ siullerpaamik torrutiinnarlugu aliikkusersuissapput.
Ukioq pisoqarfiusimaqisoq Nuummi kulturip illorsuanut Katuamut aamma naaqqajaalerpoq pisullu naggaserlugit ukiormanna tusarnaartitsinerit kingullersaat arfininngornermi pissaaq. Appisimaartussaq tassaavoq Kimmernaq Kjeldsen upernaap naalernerani cd-liaminik ’Uani’mik saqqummersitsisoq unnuup ingerlanera aliikkutassianik assigiinngitsunik immerlugu tusarnaartitsisussaq.
Kimmernap inooqataa Mike F. Thomsen unnuup ingerlanerani aamma scenemut qaqiumaarpoq. Quianartoqassaarlu Eqaluk Høegh aamma Martin Brandt TV-mi quiasaarummit ’Labrador Kangian’ Suaasat’-nit ilisimaneqartut siullerpaamik torrutiinnarlugu aliikkusersuilerpata.
Unnuk taanna pingaarnertut tusarnaartitsisussaq Kimmernaq Kjeldsen 2013-mi nuannarineqarluarpoq. 2012-mi tusarnaagassiaq nuannarisaaqisoq ’Qullissara’ peqataaffigaa aappassaannillu kisimiilluni saqqummersitaa ’Uani’ tusarnaartunit ilassilluarneqarluni 3.000-it sinnerlugit tunisaareerpoq. Tamanna kultimik nuutinnassutigaa tamannalu tusarnaartitsinerit kingullersaanni malunnartinniarneqassaaq.