Ritalininik atornerluisoqarsinnaanera Mimi Karlsenip ukiarli maluginiarsimagaa
Peqqissutsimut Naalakkersuisoqarfik, Nunatta Nakorsaaneqarfia aamma Kalaallit Nunaanni Politiit unioqqutitsilluni Ritalininik tuniniaasoqartarnera pillugu ataatsimiinnikuupput, peqqissutsimut naalakkersuisoq ilisimatitsivoq.
Nakorsaatinik allagartalinnik Ritalininik unioqqutitsilluni tuniniaasoqartarsinnaanera, meeqqanut, inuusuttunut, ilaqutariinnut peqqissutsimullu naalakkersuisup, Mimi Karlsenip ilisimavaa.
Sermitsiaq.AG-p allaaserisat arlallit tunuliaqutigalugit tamanna uppernarsarnikuuaa.
Tusagassiorfik tassunga atatillugu Mimi Karlsen apersorumagaluarpaa, kisianni tamanna periarfissaanngilaq, naalakkersuisoqarfia taama ilisimatitsivoq, illuanik allagaqarluni akissuteqarpoq.
Allagartat nalilersoqqinneqassasut
Mimi Karlsen ukiaanerani allattoqarfini tamatuminnga ukkatarinnissasoq qinnuiginnissimasoq tassani atuarneqarsinnaavoq. Oqarneralu naapertorlugu tassunga atatillugu Peqqissutsimut Naalakkersuisoqarfik peqqinnissaqarfimmik, nakorsaaneqarfimmik politiinnillu ataatsimeeqateqarpoq.
- Tamatuma saniatigut Nunatta Nakorsaaneqarfia, ilaatigut peqqinnissaqarfimmik avataanit nakkutiginnittoq, peqqinnissaqarfimmi Ritalininik tunniussisarnerup misissorneqarnissaa piumaffigaara, kiisalu nakorsaatinut allagartat nalilersoqqinneqassasut.
Nunatta nakorsaanera Henrik L. Hansen, nakorsiartut Ritalininut allagartanik pisartut misissoqqullugit peqqinnissaqarfimmut qinnuiginnissimalluni siornatigut ilisimatitsinikuuvoq. Ritalinik naleqqutinngitsumik atuisoqartarnersoq allanullu tunniussisoqartarnersoq tassani qulakkeerniarneqassaaq.
Peqqinnissaqarnermut qinnuiginninneq taanna pillugu suli nutaarsiassaqanngitsoq, nakorsaaneq ilisimatitsivoq.